9 ოპოზიციური პარტიისგან შემდგარი საკოორდინაციო საბჭო მუშაობს დოკუმენტზე, რომელიც რუსეთის მიერ განხორციელებული ანექსიის შესახებ საერთაშორისო თანამეგობრობის საქმის კურსში ჩაყენებას ითვალისწინებს, – აღნიშნულთან დაკავშირებით ”ნაციონალური მოძრაობის” ოფისში საკოორდინაციო საბჭოს შეხვედრა მიმდინარეობს. საბჭო დოკუმენტის ტექსტს დღეს გაავრცელებს.
როგორც ჟურნალისტებს ”ნაციონალური მოძრაობის” ერთ-ერთმა ლიდერმა ნიკა რურუამ განუცხადა, ეს დოკუმენტი კონკრეტულად ეხება რუსეთის მხრიდან ე.წ. სამხრეთ ოსეთის სამხედრო შენაერთების მიერთებას.
”საკოორდინაციო საბჭო მუშაობს დოკუმენტის ტექსტზე, რომელიც ეხება რუსეთის მიერ საქართველოს სუვერენიტეტისა და ტერიტორიული მთლიანობის ხელყოფის ფაქტს. საუბარია ე.წ. სამხრეთ-ოსეთის შეიარაღებული ძალების შენაერთების რუსეთის არმიის მიერ შეერთებაზე. ეს სიტუაციას არსებითად არ ცვლის, მაგრამ ხაზს უსვამს იმ ფაქტს, რომ ანექსია გრძელდება. ოკუპაცია იღებს უფრო და უფრო გროტესკულ ფორმებს და ამაზე საქართველოს ხელისუფლების მოქმედებები არაადეკვატურია და ვერ რეაგირებს თავისუფალი სამყაროსა და საერთაშორისო თანამეგობრობის საქმის კურსში ჩაყენების თაობაზე. ამ მიმართულებით ინფორმაციას ვაწვდით როგორც ქართულ საზოგადოებას, ასევე დანარჩენ მსოფლიოს, თუ რა მიზნებს ემსახურება პუტინის ეს ნაბიჯი. ეს არის მკაფიო არაორაზროვანი სამართლებრივი დოკუმენტი, რომლითაც გვინდა, რომ მოხდეს საერთაშორისო საზოგადოების ინფორმირება მაშინ, როცა საქართველოს ხელისუფლება ამას არ აკეთებს. სწორედ ამაზე უნდა მუშაობდეს საქართველოს ხელისუფლება და განგაშის ტონით უნდა ამცნოს დღეს მთელ სამყაროს ამ უკანონობის შესახებ”, – განაცხადა რურუამ.