შინაგან საქმეთა სამინისტრომ იარაღის და ნარკოტიკის ჩადების კამპანია დაიწყო – ასე ემაურება პრეზიდენტის შვილის ანა მარგველაშვილის მიერ რუსთავი 2 – ის ეთერში გაკეთებულ განცხადებას ნაციონალური მოძრაობის ლიდერი ნიკა მელია.
,,შინაგან საქმეთა სამინისტრო იარაღისა და ნარკოტიკის ჩადების კამპანიას ახორციელებს – აცხადებს იგი – ამის არაერთი დამამტკიცებელი ფაქტი, აუდიო თუ ვიდეო ჩანაწერი ვნახეთ. გვახსოვს, რამდენიმე თვის წინ პრაქტიკულად პირდაპირ ეთერში ახალგაზრდა ბიჭს ნოდარ ნიშნიანიძეს საკუთარ სახლში ჩაუდეს იარაღი, დედისა და მეუღლის თვალწინ და სპეცრაზმი კარებს უმტვრევდა. ასევე გვახსოვს ძმები ფეიქრიშვილები, რომლებსაც იარაღი ჩაუდეს. დღეს, როდესაც პრეზიდენტის ოჯახის წევრები საუბრობენ იარაღის და ნარკოტიკის მოსალოდნელ ჩადებაზე, მაშინ როდესაც პრეზიდენტის ოჯახის წევრის მეგობარი დაკავებულია დანაშაულებრივად, ბუნებრივია, ეს საგანგაშოა და ყველა, განურჩევლად კუთვნილებისა, რომელი პარტიის დეპუტატიც არ უნდა იყოს , უნდა იღებდეს ხმას. რატომ ვართ ამ პარლამენტში, რას აკეთებს ,.,ქართული ოცნების“ დეპუტაცია თუ ამ საკითხზე ხმას არ ამოიღებს. როდესაც პრეზიდენტის ოჯახი გამოდის და კონკრეტული ფაქტებით საუბრობს, მე ვფიქრობ, ეს საგანგაშოა. მე გამოძიების იმედი არ მაქვს. ქართული საზოგადოების მჯერა და მათი აზრის კონსოლიდაცია თუ შეაჩერებს ივანიშვილის დანაშაულებრივ პოლიციას, რომელმაც წამოიწყო კამპანია ნარკოტიკის და იარაღის ჩადების“, – განაცხადა ნიკა მელიამ.