გუშინ, კრემლში, რუსეთის პრეზიდენტსა და ოკუპირებული სამხრეთ ოსეთის ე.წ. პრეზიდენტის ლეონიდ თიბილოვის შეხვედრა გაიმართა.
მხარეებმა განიხილეს უსაფრთხოების, სოციალურ-ეკონომიკური და პოლიტიკური საკითხები, მათ შორის ოკუპირებულ სამხრეთ ოსეთში ე.წ. საპრეზიდენტო არჩევნები. ვლადიმერ პუტინმა წარმატება უსურვა ლეონიდ თიბილოვს ე.წ. საპრეზიდენტო არჩევნებზე, რომელიც უახლოეს ხანებში გაიმართება.
,,დღეს ჩვენ შეგვიძლია ვისაუბროთ ახალ შენობებზე, ახალ გზებზე, სოციალური დანიშნულების ობიექტებზე, ყველაფერი ეს საგრძნობია და, რა თქმა უნდა, ეს დიადი რუსეთის დამსახურებაა – განაცხადა თიბილოვმა – შემიძლია კონკრეტულად გითხრათ, რომ ხალხი უკვე სხვანაირად უყურებს ცხოვრებას, ხოლო ჩვენი თანამშრომლობა რუს კოლეგებთან უამრავი პროგრამის რეალიზებაში, მათ შორის საინვესტიციო პროგრამებში, ხელსაყრელ შედეგს იძლევა“, – აღნიშნა ლეონიდ თიბილოვმა.
ვლადიმერ პუტინმა აღნიშნა, რომ რუსეთსა და სამხრეთ ოსეთს შორის მოკავშირული ურთიერთობები ჩამოყალიბდა, ჩვენ კმაყოფილნი ვართ იმით, რომ სიტუაცია თქვენს ქვეყანაში სტაბილურია- დასძინა მან და გამოთქვა იმედი, რომ საპრეზიდენტო არჩევნები ცხინვალში ასევე მშვიდ და სტაბილურ ვითარებაში ჩაივლის.