ფოთში, მდინარეების კაპარჭისა და უჩაღალის ნაპირებზე წყალმა დიდი რაოდენობით მკვდარი თევზი გამორიყა. მეთევზეების თქმით, ძირითადად კარჩხანაა. ისინი ვარაუდობენ, რომ თევზების მასობრივი დაღუპვა რაღაც დაავადებით შეიძება იყოს გამოწვეული.
,,ჩემი აზრით, რაღაც ავადმყოფობაა გავრცელებული, თორემ წყალზე, რომ იყოს დამოკიდებული, ყველა სახეობის თევზი დაიხოცებოდა. ჩვენ მიზეზი არ ვიცით. მოვითხოვთ, სპეციალისტებმა გამოიკვლიონ,თუ რამ გამოიწვია თევზების დახოცვა“, – განაცხადა მეთევზე შუქურ ხარბედიამ ინტერპრესნიუსთან საუბარში.
გარემოს ეროვნული სააგენტოს თევზაობისა და შავი ზღვის მონიტორინგის სამსახურის უფროსი არჩილ გუჩმანიძე აცხადებს, რომ ისინი მომხდარის შესახებ ინფორმირებულები არიან. მისივე თქმით, სპეციალურმა ჯგუფმა წყლისა და თევზის სინჯები აიღო. თუ რამ გამოიწვია თევზის დახოცვა რამდენიმე დღეში გახდება ცნობილი..