დაიწყო საქართველოს პრეზიდენტის გიორგი მარგველაშვილის სამუშაო ვიზიტი ბაქოში
დღეს, გიორგი მარგველაშვილი მონაწილეობას მიიღებს ბაქოს მე-5 გობალური ფორუმის „საერთაშორისო ურთიერთობების მომავალი“ მუშაობაში, რომლის მთავარ განსახილველ საკითხებს შორისაა ევროპის მომავალი და პოპულიზმისა და ექსტრემიზმის საფრთხე საერთაშორისო უსაფრთხოებისათვის.
ფორუმის გახსნის ცერემონიალზე გიორგი მარგველაშვილი 50-ზე მეტი ქვეყნის ყოფილ და მოქმედ ლიდერებს მიმართავს სიტყვით , იგი ისაუბრებს რეგიონში არსებულ გამოწვევებზე, საქართველოს როლზე საერთაშორისო ურთიერთობებში და მის მნიშვნელობაზე
პრეზიდენტის ადმინისტრაცის ცნობით,გიორგი მარგველაშვილი აზერბაიჯანის პრეზიდენტ ილჰამ ალიევთან პირისპირ შეხვედრასაც გამართავს. დაგეგმილია შეხვედრები ასევე სხვადასხვა ქვეყნის პრეზიდენტებთან.
სამუშაო ვიზიტის ფარგლებში, აზერბაიჯანის პრეზიდენტის ადმინისტრაციის აკადემიაში, საქართველოს პრეზიდენტისთვის საპატიო დოქტორის წოდების მინიჭების ოფიციალური ცერემონიაც გაიმართება.
ასევე დაგეგმილია საქართველოს პრეზიდენტის გიორგი მარგველაშვილის ინტერვიუები ადგილობრივი მედიის წარმომადგენლებთან.
საქართველოს პრეზიდენტის დელეგაციის შემადგენლობაში არიან პრეზიდენტის ადმინისტრაციის უფროსი გიორგი აბაშიშვილი, ეროვნული უშიშროების საბჭოს მდივანი დავით რაქვიაშვილი, საქართველოს პრეზიდენტის საგარეო ურთიერთობათა მდივანი თენგიზ ფხალაძე და ეროვნული უშიშროების საბჭოს მდივნის მოადგილე ივანე მაჭავარიანი.