ე. წ. ციანიდის საქმეში ამ დრომდე პასუხგაუცემელი რჩება მთავარი კითხვები  – ვისი მოკვლა იგეგმებოდა, ან საერთოდ თუ იგეგმებოდა ვინმეს მოკვლა, ან ვის ინტერესებში მოქმედებდა დეკანოზი  გიორგი მამალაძე.

 

რაც უფრო დიდი დრო გადის, მით მეტ კითხვას ბადებს საპატრიარქოში მიმდინარე მოვლენები – კათოლიკოს-პატრიარქის უახლოესი გარემოცვის წევრებიდან მის გვერდით სულ უფრო ნაკლები ადამიანი დგას. მამა გიორგი მამალაძე ციხეში ზის, პატრიარქის ნათესავი და პირადი დაცვის ხელმძღვანელი, სოსო ოხანაშვილი პოსტიდან გადადგა, ილია მეორის ძმისშვილმა, მეუფე დიმიტრიმ საჯაროდ თქვა უარი პატრიარქობაზე და ის, ძირითადად, დუმილს ინარჩუნებს, ხოლო ჭყონდიდის მიტროპოლიტს, მეუფე პეტრეს, რომელიც ღიად უპირისპირდება ოპატრიარქის მდივან – რეფერენტს შორენა თეთრუაშვილს, სინოდმა საპატრიარქოს ტელევიზიის ხელმძღვანელობა ჩამოართვა. 

თეოლოგებისა და ფართო საზოგადოების აზრით, ციანიდის საქმე აისბერგის ზედა ნაწილია, რა ხდება საპატრიარქოში – ღრმა წყალშია ჩაფლული.

 

თუ საქმეს არ შეწყვეტენ, სასამართლო პროცესზე სინოდის 47 წევრის დაკითხვა იქნება საჭირო, ძალიან ბევრი მასალა მაქვს, – აცხადებს  ე.წ. ციანიდის საქმეზე ბრალდებულ დეკანოზ გიორგი მამალაძის ადვოკატი მიხეილ რამიშვილი

 „პროკურატურას არაერთხელ მივმართე, შეწყვიტეთ საქმე-მეთქი, ჩუმად ვარ ჯერჯერობით, რადგან ვიცავ სახელმწიფოსა და საპატრიარქოს ინტერესებს, მაგრამ თუ საქმეს არ შეწყვეტენ, ძალიან ბევრი რამე ვიცი და ამას მსვლელობა მიეცემა.

ძალიან ბევრი მასალა მაქვს, ვურჩევ, დაამთავრონ ეს სპექტაკლი, თორემ სასამართლო პროცესზე სინოდის 47 წევრის დაკითხვა იქნება საჭირო, “, – განაცხადა მიხეილ რამიშვილმა  გაზეთ „კვირის პალიტრისთვის“ მიცემულ ინტერვიუში .