ოზურგეთის პოლიციაში მიკროავტობუსების ქურდობის ფაქტზე ”ქართული ოცნების” ოზურგეთის ორგანიზაციის ერთერთ ლიდერის, ბექა ფუტკარაიას დაკითხვა მიმდინარეობს. ბექა ფუტკარაია ”ქართული ოცნების” ოზურგეთის რაიონული ორგანიზაციის გამგეობის წევრი და პოლიტიკური მდივანია.
”გურიის მოამბის” ცნობით, იგი ამ ეტაპზე მოწმის სტატუსით იკითხება და დაკითხვის შემდეგ გახდება ცნობილი, წაუყენებს თუ არა მას ბრალს პოლიცია მიკროავტობუსების გატაცებასთან კავშირისათვის .
წუხელ, ქალაქ ოზურგეთის ცენტრალურ ქუჩაზე, გამოძიებისათვის ჯერჯერობით დაუდგენელმა პირებმა, ორი მიკროავტობუსი, მას შემდეგ გაიტაცეს, როცა, სამუშაო საათების დასრულების შემდეგ, საცხოვრებელი სახლისაკენ მიმავალმა მძღოლებმა, მაღაზიაში შეიარეს.
გატაცებული ორი მიკროავტობუსიდან, ერთი პოლიციამ დღეს ოზურგეთის მუნიციპალიტეტის სოფელ მშვიდობაურში-ოქროსხედის უბანში, ბახვის თემში იპოვა. ამას სოფლის რწმუნებულიც ადასტურებს.
ბახვის მოსახლეობის განცხადებით, გატაცებული მიკროავტობუსი მთლიანად გაძარცული, დაშლილი და მიტოვებული იყო.
მიმდინარეობს წუხელ გატაცებული მეორე მიკროავტობუსის ძებნაც.