ომბუდსმენი უჩა ნანუაშვილი იზიარებს ოპოზიციის კრიტიკასა და არგუმენტებს ე.წ. ფარული მოსმენების შესახებ კანონთან დაკავშირებით. – ამის შესახებ მან განაცხადა ნაციონალური მოძრაობის წევრებთან შეხვედრის შემდეგ, სადაც მას ალტერნატიული პროექტი გააცნეს.
ომბუდსმენი ამბობს, რომ საყოველთაო უნდობლობის ფონზე, დამატებითი მექანიზმები, რომელიც ფარული მიყურადება-თვალთვალის შეუზღუდავად კონტროლის შესაძლებლობას იძლევა, აუცილებელია.
„სახალხო დამცველი იქნება დაინტერესებული, მითუმეტეს იმ ფონზე, როდესაც საყოველთაო უნდობლობა არსებობს ამ საკითხთან დაკავშირებით საზოგადოებაში, რომ ჩვენ გარკვეულწილად დამატებითი მექანიზმი გავხდეთ იმასთან დაკავშირებით, რომ მოსმენების საკითხი ერთხელ და სამუდამოდ ქვეყანაში დამთავრდეს,“ – განაცხადა უჩა ნანუაშვილმა.
ნაციონალური მოძრაობის მიერ შემუშავებული ალტერნატიული კანონპროექტი, ორგასაღებიან სისტემას გულისხმობს.
გარდა ამისა, პარტიის ლიდერები მიიჩნევენ, რომ სახალხო დამცველს, ოპოზიციის ერთ დეპუტატს და საპარლამენტო უმრავლესობის ასევე ერთ წევრს, ფარულ მიყურადება-მოსმენებზე მონიტორინგის შეუზღუდავად განხორციელების საშუალება უნდა ქონდეთ.
„ეს იქნება ერთადერთი გზა, რომ გათვალისწინებულ იქნეს, როგორც სახელმწიფო უსაფრთხოების, ასევე მოქალაქეთა პირადი ცხოვრების დაცულობის ინტერესები. ჩვენი ინიციატივა ითვალისწინებს სამმაგ დაცვას, სახალხო დამცველს, უმრავლესობის წარმომადგენელს და ოპოზიციის წარმომადგენელს ნებისმიერ დროს უნდა ჰქონდეს დაშვება მოსმენების, როგორც ტექნიკურ, ასევე სამართლებრივ მხარესთან,“ – აცხადებს ზაზა ბიბილაშვილი.