ზუგდიდის მუნიციპალიტეტის სოფელ ანაკლიაში საოკუპაციო ხაზთან ახლოს ადგილობრივი მონადირე დავით ცერცვაძე გაიტაცეს. არსებული ინფორმაციით, გატაცება მაშინ მოხდა, როცა ის მეგობართან ერთად გადამფრენ ფრინველებზე ნადირობდა. ცერცვაძესთან ერთად მყოფმა თავს გაქცევით უშველა, მისი ინფორმაციით, გატაცებული ოკუპირებული გალის მიმართულებით წაიყვანეს. მომხდარზე კომენტარს არ აკეთებენ გატაცებულის ოჯახში, ამჟამად მხოლოდ ის არის ცნობილი, რომ გატაცებულის გამოსასყიდად გამტაცებლებმა 2 700 ლარი მოითხოვეს.
საქართველოს მოქალაქის გატაცების ფაქტს ადასტურებენ სახელმწიფო უსაფრთხოების სამსახურში. უწყების ინფორმაციით, საოკუპაციო რეჟიმის წარმომადგენლების მიერ ცერცვაძის დაკავება ე.წ საზღვრის უკანონო გადაკვეთის ბრალდებით მოხდა. უსაფრთხოების სამსახურის განცხადებით მიმდინარეობს მუშაობა საქართველოს მოქალაქის გასათავისუფლებლად.