თბილისის საკრებულოს ოპოზიციონერმა წევრებმა დღეს ერთობლივი განცხადება გააკეთეს. ისინი მოითხოვენ გაუქმდეს დადგენილება, რომლის საფუძველზეც მოსამართლე ნატა ნაზღაიძის ოჯახს ერთი მილიონი ლარი გადაეცა და აცხადებენ, რომ ამ საკითხში სისხლის სამართლის დანაშაულის ნიშნები იკვეთება.ს
ფრაქცია ,,ერთიანი ნაციონალური მოძრაობის'' წევრი მარინა დათუკიშვილი აცხადებს, რომ საჯარო რეესტრმა მოსამართლე ნატა ნაზღაიძის ძმას 5 000 კვადრატული მეტრი მიწის ფართობი, ფაქტობრივად, ვალდებულების გარეშე დაურეგისტრირა და ახლა მას ამ ტერიტორიაზე ინფრასტრუქტურული პროექტების განაშენიანების უფლება აქვს.
„თბილისის საკრებულო თავიდან ბოლომდე იყო შეყვანილი შეცდომაში, თბილისის საკრებულოს დეპუტატებს არ ჰქონდათ სრული ინფორმაცია. ჩვენი ერთობლივი გადაწყვეტილებით, ჩვენ შევიმუშავეთ განკარგულება 23 დეკემბრის დადგენილების ბათილად ცნობასთან დაკავშირებით და ჩვენ მოვუწოდებთ დანარჩენ დეპუტატებს, უმრავლესობის დეპუტატებს, ამ განკარგულების განხილვაში,“ – განაცხადა თბილისის საკრებულოს ფრაქცია თბილისის თავმჯდომარემ, მამუკა ახვლედიანმა.
თავის მხრივ, საკრებულოს თავმჯდომარე გიორგი ალიბეგაშვილი აცხადებს, რომ ,,საკრებულომ ნატა ნაზღაიძის ოჯახის წევრისთვის 1 მილიონი ლარის გადაცემის საკითხზე მიიღო კანონიერი გადაწყვეტილება, იმოქმედა კანონის ფარგლებში. ის დოკუმენტაცია, რომელიც იყო შემოტანილი, არანაირი ეჭვის საფუძველს არ იძლევა“
ამასთან მან აღნიშნა, რომ უმცირესობის წევრების მოთხოვნას, საკითხის ხელახლა განხილვის თაობაზე, ის არ ეწინააღმდეგება.
ჯერჯერობით უცნობია, რა გადაწყვეტილებას მიიღებს უმრავლესობა ნატა ნაზღაიძის ოჯახისთვის გადაცემული თანხის დებულებაზე.