ნაციონალური მოძრაობის ლიდერი ნიკა მელია ბავშვთა სამყაროს დაზარალებულ მოვაჭრეებს ხვდება. ნიკა მელიასთან ერთად ადგილზე იმყოფება ნაციონალური მოძრაობის წარმომადგენელი და საკრებულოს წევრი მარიკა დათუკიშვილი.
ნიკა მელია აცხადებს, რომ სახანძრო სამსახურის წარმომადგენელი უნდა მივიდეს და გასცეს პასუხი ხალხს.
მოვაჭრეები კედლის დემონტაჟს და იმ სეიფების ჩვენებას ითხოვენ, სადაც ოქრო ინახებოდა. დაზარალებულები დილიდან მოითხოვენ ხელისუფლებისგან შენობის დაცვას, მათი განცხადებით, ოქროს ნივთების დიდი ნაწილი სეიფებშია მოთავსებული, შესაბამისად, საჭიროა სამართალდამცავების მეთვალყურეობა, რათა გადარჩენილი ნივთების დაკარგვა არ მოხდეს.
მცირე ხნის წინ მერიის წარმომადგენლებსა და მოვაჭრეებს შორის მცირე დაპირისპირებაც მოხდა. „სად არის სახელმწიფო, მოკვდა სახელმწიფო,“- აცხადებენ დაზარალებულები.
ხანძარი სავაჭრო ცენტრში დილის 4 საათისთვის გაჩნდა. ცეცხლი მთელ შენობას მოედო და ის მთლიანად დამწვარია. დაზარალდა ათეულობით ადამიანი, რომლებიც იქ ვაჭრობდნენ. ბავშთა სამყაროს შენობაში გაჩენილ ხანძარზე გამოძიება სხვისი ნივთის განზრახ დაზიანების მუხლით დაიწყო.