,,ნაციონალურ მოძრაობაში'' განახლების პროცესი მიმდინარეობს. – ასე შეაფასა პარტიიდან გარკვეული ჯგუფის წასვლა მიხეილ სააკაშვილმა გადაცემა ,,არჩევანისთვის'' მიცემულ ინტერვიუში, რომელიც დღეს საღამოს გავიდა რუსთავი 2 – ის ეთერში. –  ეს პირველად არ მომხდარა ნაციონალური მოძრაობის ისტორიაში, ადამიანების ჯგუფები ყოველთვის მიდიოდნენ და მათ ადგილს იკავებდნენ სხვები. პარტია ცოცხალი ორგანიზმია, განვითარების პროცესში რაღაც უჯრედები კვდებიან, რაღაც ახალი უჯრედები იბადებიან.''

მიხეილ სააკაშვილი ვერ ხედავს პრობლემას  პარტიიდან მორიგი ჯგუფის, კერძოდ ბოკერია – უგუავას გუნდისა და მათი თანამაზრეების წასვლაში, უფრო მეტიც, მიაჩნია, რომ  ეს ხელს შეუწყობს განახლების პროცესს. 

,,ნაციონალური მოძრაობის ფორმალურად მმართველ ჯგუფში აშკარად იყო ბიუროკრატიზაციისა და დაჭაობების ნიშნები, ეს იყო დაკავშირებული იმასთან, რომ მე საქართველოში ვერ ჩამოვდივარ, ეს დაკავშირებული იყო პოლიტიკურ რეპრესიებთან, იმასთან, რომ ეს არის ყოფილი ხელისუფლების პარტია და ისინი, ვინც იყო ხელისუფლებაში,  ძნელად გადადიან სხვა მდგომარეობაში, ოპოზიციურ მდგომარეობაში. აბსოლუტური უმეტესობა იმ ხალხისა, ვინც პარტიიდან წავიდა,  ყოფილი მაღალი თანამდებობის პირები არიან, ეს ბიუროკრატიის ძველი ნაწილია და ისინი ბოლომდე  ვერ მოერგნენ ხელახლა პარტიულ, ოპოზიციურ, ხალხოსნურ მოღვაწეობას, ამიტომ  ის, ვინც  განახლება ვერ მოახერხა, ჩამოშორდა პარტიას, ეს არის ძალიან დადებითი პროცესი"- განაცხადა მიხეილ სააკაშვილმა.