რუსი დიპლომატები, ოჯახის წევრებთან ერთად შეერთებულ შტატებს ტოვებენ. ობამას ადმინისტრაციის მიერ დამატებითი სანქციების ამოქმედების გამო, ქვეყანა რუსეთის 96-მა მოქალაქემ უნდა დატოვოს.
ვაშინგტონი მოსკოვის მხრიდან საპასუხო ზომების მოლოდინშია. შეერთებული შტატების სახელმწიფო დეპარტამენტში აცხადებენ, რომ ვლადიმერ პუტინის გადაწყვეტილებასთან დაკავშირებით სათქმელი არაფერი აქვთ.
აშშ-სა და რუსეთს შორის ბოლო დიპლომატიური სკანდალის კულმინაცია ვლადიმერ პუტინის გადაწყვეტილება იყო. რუსეთის პრეზიდენტი რუსი დიპლომატების აშშ-დან გაძევებას ამერიკელი დიპლომატების ქვეყნიდან გაძევებითვე არ პასუხობს და ვაშინგტონთან ურთიერთობის გაუმჯობესებას დონალდ ტრამპის ინაუგურაციის შემდეგ შეეცდება.
დონალდ ტრამპმა კი რუსეთის ლიდერის ნაბიჯი დადებითად შეაფასა. შეერთებული შტატების არჩეულმა პრეზიდენტმა აღნიშნა, რომ პუტინის მხრიდან ამერიკელი დიპლომატების გაძევებაზე უარის თქმა ჭკვიანური ნაბიჯი იყო.
რუსეთის საგარეო საქმეთა უწყებაში კიდევ ერთხელ გაიმეორეს, რომ ობამას გადაწყვეტილება ორმხრივი ურთიერთობების გაუარესებაზეა მიმართული და იმედი გამოთქვეს, რომ ეს ბოლო ნაბიჯია, რომელიც ამ მიზნით მოქმედმა ადმინისტრაციამ გადადგა.
„იმის მიუხედავად, რომ დიპლომატია ეფუძნება სარკისებრ ზომებსა და საპასუხო ნაბიჯებს, რუსეთის ფედერაციამ და ოფიციალურმა პირებმა ამერიკული მხარისგან განსხვავებით, სრული სერიოზულობით იფიქრეს იმაზე თუ როგორც იგრძნობდნენ თავს ჩვენი ამერიკელი კოლეგები საპასუხო ზომების შემთხვევაში. იმედს ვიტოვებთ, რომ ეს ბოლო ნაბიჯია, რომელიც მოქმედმა ადმინისტრაციამ ორმხრივი ურთიერთობების გაუარესებისთვის გადადგა და ბოლო უცნაური და არაჭკვიანური გადაწყვეტილებაა,“ – განაცხადა რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ.
შეგახსენებთ, რომ ბარაკ ობამა პრეზიდენტობის ვადის ამოწურვამდე მოსკოვს ხისტი გადაწყვეტილებებით პასუხობს. ვაშინგტონზე კიბერშეტავას და არჩევნების პროცესში ჩარევას რუსი დიპლომატების ქვეყნიდან გაძევება მოჰყვა.