ენერგომატარებლებზე ტარიფის ცვლილებასთან დაკავშირებულ გადაწყვეტილებას პურის მწარმოებლები ელოდებიან. მათი თქმით, დენის გადასახადთან ერთად ავტომატურად გაიზრდება პურის ფასიც.
თუ ამ დრომდე გაძვირებული ხორბალი და ვალუტის გაუფასურება პურის ფასზე არ ასახულა, მცხობელები ამბობენ, რომ ტარიფის შეცვლის შემდეგ, ისინი გაძვირების შეჩერებას ვეღარ შეძლებენ.
პურისა და პურპროდუქტების მწარმოებლები ფქვილის გაძვირებით გამოწვეულ დანაკარგებზე საუბრობენ და ამბობენ, რომ ფასის შენარჩუნებას ამ დრომდე ახერხებენ. სავალუტო კრიზისის გაგრძელებისა თუ ენერგომატარებლების გაძვირების შემთხვევაში, კი მათ ფასების კორექტირება მოუწევთ. ეს პურთან ერთად საკონდიტრო ნაწარმის ფასებსაც ეხება.