მერვე მოწვევის პარლამენტი  თავის პირველ მთავრობას დაამტკიცებს. რიგგარეშე სესია დღეს 12 საათზე დაწიყება. მინისტრთა კაბინეტს და მთავრობის პროგრამას – ”თავისუფლება, სწრაფი განვითარება, კეთილდღეობა”, დეპუტატებს პრემიერ-მინისტრობის კანდიდატი,  გიორგი კვირიკაშვილი, წარუდგენს. მთავრობაში ცვლილებები ძირითადად ეკონომიკური მიმართულებით განხორციელდა. ფინანსთა მინისტრის თანამდებობას დიმიტრი ქუმსიშვილი დაიკავებს. ეკონომიკის მინისტრი გიორგი გახარია გახდება. ინფრასტრუქტურის მინისტრი – ზურაბ ალავიძე. ენერგეტიკის მინისტრის თანამდებობას კი ისევ კახა კალაძე დაიკავებს და ევროინტეგრაციის საკითხებში სახელმწიფო მინისტრის თანამდებობას – თავისუფალი დემოკრატების ყოფილი წევრი, ვიქტორ დოლიძე.მთავრობის შემადგენლობაში აღარ იარსებებს დიასპორის საკითხებში სახელმწიფო მინისტრის აპარატი, რომელიც საგარეო საქმეთა სამინისტროს შეუერთდება. პრემერ-მინისტრის კანდიდატურას, მთავრობის სამოქმედო გეგმას და მთავრობას პარლამენტი ერთად უყრის კენჭს.  ნდობის მისაღებად მთავრობას პარლამენტის სიითი შემადგენლობის უმრავლესობის მხარდაჭერა სჭირდება.