ინტერპოლი გიგა ოთხოზორიას მკვლელის ძებნას წითელი ცირკულარით უახლოეს მომავალში დაიწყებს. – ამის შესახებ საქართველოს შინაგან საქმეთა მინისტრის მოვალეობის შემსრულებელმა გიორგი მღებრიშვილმა პარლამენტის რამდენიმე კომიტეტის გაერთიანებულ სხდომაზე განაცხადა. მისი თქმით, შესაბამისი მიმართვა ინტერპოლში უკვე გაგზავნილია ამასთან მკვლელის დაკავებასა და გადმოცემაზე მოლაპარაკებები ინციდენტების პრევენციის და მათზე რეაგირების მექანიზმის ფარგლებშიც მიმდინარეობს.
”ეს ტერიტორია, რომ უკონტროლოა ახალი არ არის, ამიტომ ამას სხვა პროცედურები სჭირდება, მოლაპარაკებები მიმდინარეობს და შედეგებს უნდა დაველოდოთ”, – მიმართა მღებრიშვილმა დეპუტატებს.
გიგა ოთხოზორია ხურჩაში 19 მაისს, ე.წ. სასაზღვრო გამშვებ პუნქტთან მოკლეს. სამეგრელო-ზემო სვანეთის საოლქო პროკურატურამ ოთხოზორიას განზრახ მკვლელობის ფაქტზე, რაშიდ კანჯიოღლის მიმართ ბრალდების შესახებ დადგენილება გამოიტანა და სისხლის სამართლებრივი დევნა დაიწყო.
მკვლელობაში ბრალდებული რაშიდ კანჯიოღლი ამჟამად დაკავებული არ არის.