არასაპარლამენტო ოპოზიცია მე-9 მოწვევის პარლამენტის არალეგიტიმურად გამოცხადებას ითხოვს. პარტიების წარმომადგენლები დღეს მორიგ შეხვედრაზე შეიკრიბნენ, სადაც დღის წესრიგში არჩევნების შედეგებთან ერთად, საარჩევნო კოდექსის ცვლილებაა.
კონსულტაციებში მონაწილე პოლიტიკურ სუბიექტთა ნაწილი არჩევნების შედეგებს აღიარებს და ცვლილებებზე კონკრეტული მსჯელობის დაწყების მომხრეა. არასაპარლამენტო პარტიების ნაწილი ადგილობრივ არჩევნებზე უპირატესობას რეგიონულ პროპორციული სისტემით ჩატარებას ანიჭებს.
საკუთარი წინადადებები საარჩევნო კოდექსში შესატან ცვლილებებთან დაკავშირებით აქვთ პატრიოტთა ალიანსის წევრებს, თუმცა მანამდე, ინაშვილის პარტია, საარჩევნო პროცესის დროს ინციდენტში მონაწილე პირების დასჯას ითხოვს.
საპარლამენტო არჩევნების პროცესში გამოვლენილ დარღვევებზე და ზეწოლის ფაქტებთან დაკავშირებით პატრიოტთა ალიანსი საგამოძიებო კომისიის შექმნის საკითხის დაყენებას, პარლამენტში, პირველივე სასესიო კვირაში აპირებს.
დაუჭერს თუ არა მმართველი გუნდი საპარლამენტო კომისიის შექმნას მხარს, ამ ეტაპზე უცნობია.