დონალდ ტრამპი შეერთებული შტატების 45-ე პრეზიდენტია. რამდენიმე წუთის წინ ამერიკული მედიის ცნობით რესპუბლიკელების კანდიდატს გამარჯვება თავად ჰილარი კლინტონმაც მიულოცა.
დონალდ ტრამპმა კი მიდთაუნ ჰილტონში რესპუბლიკური პარტიის მხარდამჭერებს სიტყვით მიმართა.
მან მხარდამჭერებს მადლობა გადაუხადა და განაცხადა, რომ პრეზიდენტობის პერიოდში მნიშვნელოვან ნაბიჯებს გადადგამს.
„მადლობა, ძალიან დიდი მადლობა ყველას. მაპატიეთ, რომ ცოტა გალოდინეთ. რამდენიმე წუთის წინ დამირეკა ჰილარი კლინტონმა. მან მოგვილოცა გამარჯვება, მე კი ვულოცავ, რომ მან დიდი სამუშაო გასწია კამპანიის დროს. ჩვენ ახლა უნდა გავერთიანდეთ, თქვენი დახმარების იმედი მაქვს, მჯერა, რომ ჩვენ ერთად ვიმუშავებთ და მნიშვნელოვან ნაბიჯებს გადავდგამთ წინ,“-განაცხადა დონალდ ტრამპმა.
მისი თქმით, არჩევნებში გამარჯვებულ ძალას აშშ-სთვის “დიდი ეკონომიკური გეგმა” აქვს.
“ჩვენ გავაორმაგებთ ზრდას და გვექნება მსოფლიოში ყველაზე ძლიერი ეკონომიკა. ამასთან, ვიმუშავებთ ყელა იმ ქვეყანასთან, რომელსაც ამის სურვილი ექნება. ჩვენ შესანიშნავი ურთიერთობები გვექნება. არც ერთი ოცნება არ არის მეტისმეტად დიდი, და არც ერთი გამოწვევა არ არის მეტისმეტად ძლიერი. არაფერი, რისი მიღწევაც ჩვენი მომავლისთვის გვინდა, ჩვენთვის არ არის ხელმიუწვდომელი. ამერიკას მხოლოდ საუკეთესო ექნება ყველაფერი,” – განაცხადა ტრამპმა.
მისი თქმით, აშშ-ს უზარმაზარი პოტენციალი აქვს.
„თითოეულ ამერიკელს ექნება შესაძლებლობა, თავისი პოტენციალი სრულად გამოიყენოს. ჩვენი ქვეყნის დავიწყებული მამაკაცები და ქალები დავიწყებულები აღარ იქნებიან“ , – განაცხადა ტრამპმა და იქვე დასძინა, რომ მისთვის აშშ-ის ინტერესები "ყოველთვის პირველ ადგილზე" იქნება.