ამ დრომდე უცნობია როდის შევა 2017 წლის  ბიუჯეტის ჩასწორებული ვარიანტის პარლამენტში. წარდგენის ვადა ფინანსთა სამინისტროს გუშინ ამოეწურა. მმართველ გუნდში განმარტებებს აკეთებენ და ლარის კურსთან დაკავშირებით შექმნილ ვითარებასაც ეხმაურებიან.ქართულ ოცნებაში ამბობენ, რომ ბიუჯეტის დაზუსტების პროცესი კანონის ფარგლებში მიმდინარეობს და პროცედურულ დარღვევებს ადგილი არ ჰქონია.„ლარის კურსს რაც შეეხება, მე დარწმუნებული ვარ, რომ რა განცხადებებიც გააკეთეს ჩვენი გუნდის წევრებმა, პროგნოზიც ასეთივე უნდა იყოს და ჩვენ მოსახლეობას შეშფოთების საფუძველი არ უნდა ჰქონდეს,“ – განაცხადა მამუკა მდინარაძემ.პარალელურად, გაურკვეველია რას გეგმავს ხელისუფლება ეროვნული ვალუტის სტაბილიზაციისთვის. ოპოზიცია ხელისუფლებას ვითარების შესაცვლელად, პირველ რიგში ხარჯების შემცირებისკენ მოუწოდებს.„მთავრობამ ეს საბიუჯეტო პროცედურები დაარღვია, რა თქმა უნდა პრობლემაა, მაგრამ უმნიშვნელოა იმ პრობლემასთან შედარებით, რასაც ჩვენი ოჯახების გაღარიბება ქვია ამ მავნებლური ეკონომიკური პოლიტიკის გამო. ქვეყანას სჭირდება ბიუჯეტი, სადაც ადმინისტრაციული ბიუროკრატიული ხარჯი არის მკვეთრად შემცირებული, რათა თავიდან ავიცილოთ ბიუჯეტის მაღალი დეფიციტი და შესაბამისად, მდგომარეობის კიდევ უფრო დამძიმება,“ – აცხადებს ენმ-ის წევრი ზურაბ ჭიაბერაშვილი.