აშშ-ს ვიცე-პრეზიდენტმა ჯოზეფ ბაიდენმა რუსეთის მხრიდან ოკუპირებულ აფხაზეთთან გაერთიანებული სამხედრო დაჯგუფებების შექმნის შესახებ გადაწყვეტილების რატიფიკაცია დაგმო, – ამის შესახებ აშშ-ს ვიცე-პრეზიდენტმა ბაიდენმა საქართველოს პრემიერ-მინისტრ გიორგი კვირიკაშვილთან სატელეფონო საუბრისას განაცხადა.
თეთრი სახლის ინფორმაციით, ბაიდენმა გიორგი კვირიკაშვილს საპარლამენტო არჩევნებში გამარჯვება მიულოცა. ვიცე-პრეზიდენტმა ხაზი გაუსვა რეგიონში საქართველოს დემოკრატიულ წინსვლას, დაადასტურა აშშ-ს მხარდაჭერა საქართველოს სუვერენიტეტისა და ტერიტორიული მთლიანობისათვის საერთაშორისოდ აღიარებულ საზღვრებში.
ლიდერები საუბრისას შეთანხმდენენ, რომ „ქართული ოცნების“ უმრავლესობით გამარჯვება არის მნიშვნელოვანი შესაძლებლობა მთავრობისათვის, გაატაროს რეფორმატორული პოლიტიკა. ვიცე-პრეზიდენტმა მოუწოდა პრემიერ-მინისტრს, მოპოვებული გამარჯვებით გააგრძელოს საქართველოს დემოკრატიული და ეკონომიკური რეფორმირების პროცესი ევროატლანტიკურ სტრუქტურებში შემდგომი ინტეგრაციისათვის.