ქართულმა ოცნებამ აჭარის უმაღლეს საბჭოში საკონსტიტუციო უმრავლესობა მოიპოვა. მმართველ პარტიას 21 მანდატიდან 14 აქვს.
გავრცელებული ინფორმაციით, აჭარის უმაღლესი საბჭოს თავმჯდომარის თანამდებობას ქართული ოცნების სიის პირველი ნომერი ნუგზარ სურმანიძე დაიკავებს. სურმანიძე აჭარის ავტონომიური რესპუბლიკის ჯანდაცვის მინისტრი იყო.
„უმაღლესი საბჭოს თავმჯდომარის კანდიდატურასთან დაკავშირებით ჯერ კონსულტაციები არ გამართულა. როგორც კი გაიმართება კონსულტაციები, უმრავლესობა დაასახელებს ღირსეულ კანდიდატს,“ – აცხადებს სურმანიძე.
ჯერჯერობით უცნობია, შევა თუ არა უმაღლეს საბჭოში ნაციონალური მოძრაობა. პარტიის ლიდერების განცხადებით, გადაწყვეტილება მას შემდეგ გახდება ცნობილი, რაც ოფიციალური შედეგები გამოქვეყნდება.
შეგახსენებთ, რომ აჭარის უმაღლეს საბჭოში ოთხი პარტია შევიდა. 14 მანდატი აქვს ქართულ ოცნებას, 5 ნაციონალურ მოძრაობას, 1 პატრიოტთა ალიანსს და 1 ნინო ბურჯანაძის პარტიას.
თუმცა, როგორც ცნობილია, პატრიოტთა ალიანსის სიის პირველი ნომერი დავით თარხანმოურავი არ აპირებს უმაღლეს საბჭოში შესვლას და მან თავისი მანდატი დაუთმო პარტიის სიის მეორე ნომერს ზაზა ოქუაშვილს.