სარფის საბაჟო-გამშვები პუნქტის თურქეთის მხარეს ხელნაკეთი ბომბის აფეთქება აღკვეთეს, ამ ინფორმაციას თურქული მედია ავრცელებს, რომელიც იუწყება, რომ ასაფეთქებელი მოწყობილობა ავტობუსში იპოვეს. მის ამოქმედებას ერთ-ერთი მგზავრი აპირებდა. ის პოლიციელებმა დააკავეს. ამ ცნობას ჯერჯერობით თურქი ოფიციალური პირები არ ადასტურებენ.რაც შეეხება სარფის საბაჟო გამშვებ პუნქტს, ის ამ დრომდე ჩაკეტილია. საქართველოს მოქალაქეები ვერც თურქეთიდან სამშობლოში ბრუნდებიან და ვერც თურქეთის მიმართულებით გამგზავრებას ვერ ახერხებენ. თურქული მხარე სასაზღვრო პუნქტის ჩაკეტვის მიზეზად ტექნიკურ გაუმართაობას ასახელებს."როგორც საქართველო ასევე თურქეთის მხარე ერთობლივი ძალებით ვცდილობთ ამ პრობლემის მოგვარებას. არის ტექნიკური ხარვეზები, რის გამოც ჯერ უცნობია როდის გადაწყდება ეს საკითხი, იქნება ეს ერთ თუ რამდენიმე საათში. არის კომპიუტერული სისტემა, რამაც გამოიწვია ეს პრობლემა" – განაცხადა თურქეთის გენერალურმა კონსულმა იასინ თემიქანიმ.