ცენტრალური საარჩევნო კომისიის მიერ გამოქვეყნებულ შედეგებს ენდობიან არასამთავრობო ორგანიზაციები. მათი თქმით, ცესკოს შედეგები დაემთხვა მათი პარალელური დათვლის შედეგებს.თუმცა, მესამე სექტორში ასობით საჩივარი უკვე დაწერილია და ამ მიმართულებით მუშაობას აგრძელებენ.„შედეგების სანდოობასთან დაკავშირებით, რაიმე ეჭვის საფუძველი არ მაქვს. რაც შეეხება პატრიოტთა ალიანსს, ამ მიმართულებით იყო ალბათ ყველაზე მეტი კითხვები. 214 საჩივარი დავწერეთ არჩევნების დღეს და შემდეგ ხმის დათვლის პროცესის შედეგად. დღეს კიდევ დაემატა გარკვეული საჩივრები ამას. ასე რომ, 240 საჩივრამდე მაინც იქნება,“ – განაცხადა სამართლიანი არჩევნებისა და დემოკრატიის საერთაშორისო საზოგადოების აღმასრულებელმა დირექტორმა მიხეილ ბენიძემ.ცესკოში საჩივრების შეტანის ვადა დღეს საღამოს 6 საათზე იწურება. არასამთავრობო ორგანიზაციები რამდენიმე უბნის შედეგების გაბათილებას ითხოვენ, მათ შორის მარნეულსა და ზუგდიდში.