ხმაური და ფიზიკური დაპირისპირება მოხდა ზუგდიდის მე-18 საუბნო-საარჩევნო ოლქში. ერთმანეთს თავისუფალი დემოკრატებისა და ქართული ოცნების წევრები დაუპირისპირდნენ.
„თავისუფალი დემოკრატების“ დამკვირვებელი ეგნატე შამუგია აცხადებს, რომ უბანზე მაჟორიტარი დეპუტატობის კანდიდატი ქალაქ ზუგდიდში „ქართული ოცნებიდან“ მერაბ ქვარაია და მუნიციპალიტეტის საკრებულოს წევრი თეიმურაზ მარკოზია მივიდნენ და გარეთ გაიყვანეს უბნის კომისიის თავმჯდომარე რომან გიგიხია . ,,თავისუფალი დემოკრატების'' წარმომადგენელი დავით ქანთარია უკან გაყვა მათ და მოსთხოვა კომისიის თავმჯდომარეს დაბრუნებოდა საკუთარი მოვალეობის შესრულებას, რასაც დაპირისპირება მოჰყვა მასა და თეიმურაზ მარკოზიას შორის.
თავად უბნის კომისიის თავმჯდომარე ამბობს, რომ მერაბ ქვარაიასთან მას საუბარი არ ჰქონია და პირად საკითხებზე სასაუბროდ რამდენიმე წუთით გაყვა მარკოზიას, რომელიც მისი ნათესავია.
„ქართული ოცნების“ საარჩევნო შტაბში გაკეთდა საგანგებო განცხადება ამ ფაქტთან დაკავშირებით. პარტიის ზუგდიდის საარჩევნო შტაბის უფროსმა ლაშა გვასალიამ კატეგორიულად უარყო ინფორმაცია მე – 18 საარჩევნო ოლქში მერაბ ქვარაიას მიერ კომისიის თავმჯდომარის გარეთ გახმობის შესახებ და ნაციონალური მოძრაობის მხრიდან მორიგი ინსინუაცია უწოდა მას, თუმცა არ უარუყვია, რომ მერაბ ქვარაია მართლაც მივიდა საარჩევნო უბანში.
ასევე დარღვევები დაფიქსირდა სხვა უბნებზეც, სადაც საჯარო მოხელეები არიან მობილიზებული და იწერება "ქართული ოცნების" სიები.