ჰაიტიზე ქარიშხალ „მეთიუს“ შედეგად გარდაცვლილთა რაოდენობამ 300-ს გადააჭარბა. ინფორმაციას ამის შესახებ ქვეყნის ხელისუფლება ავრცელებს. „ბიბისი“-ს ცნობით, დაღუპულთა ზუსტი რაოდენობა ჯერ კიდევ უცნობია, რადგან მაშველებს ქვეყნის განაპირა რეგიონებში მუშაობა არ დაუწყიათ.
ქვეყანაში ქარიშხლის შედეგად გარდაცვლილი ადამიანების რაოდენობა სწრაფი ტემპით იზრდება. ჯერ კიდევ გუშინ, ქვეყნის ხელისუფლება 23 გარდაცვლილი ადამიანის შესახებ საუბრობდა, დღეს მათი რაოდენობა 283-მდე გაიზარდა. საინფორმაციო სააგენტო „როიტერის“ წყაროს მიხედვით, გარდაცვლილთა რაოდენობა ამ დროისთვის 339-ია. არსებული ინფორმაციით, როშ-ა-ბატოში 50 ადამიანი დაიღუპა, ჟერემიში კი შენობა-ნაგებოების 80 % დაინგრა.
სტიქიას ამერიკის შტატ ფლორიდაშიც ელოდებიან. ქარიშხლის პროგნოზირების ეროვნული ცენტრი მოსახლეობას აფრთხილებს, რომ ქარიშხლით გამოწვეული შტორმის შედეგად, ტალღების სიმაღლემ, შესაძლოა, 5 მეტრს მიაღწიოს, რაც დამატებით ზარალს გამოიწვევს. ეს ჰაიტისა და კუბას შემდეგ ყველაზე ძლიერი ქარიშხალია უკანასკნელი ათწლეულის განმავლობაში.სტიქიური უბედურების დონე 5-დან მეოთხე კატეგორიით არის შეფასებული. მსგავსი სიძლიერის ქარიშხალი ფლორიდას უკანასკნელად 2004 წელს დაატყდა თავს.
ფლორიდის აღმოსავლეთ სანაპიროს მილიონობით ადამიანი ტოვებს.
მეტეოროლოგების ცნობით, ფლორიდის შემდეგ ქარიშხალი ჯორჯიისა და სამხრეთ კაროლინის შტატებისკენ გადაინაცვლებს.
ამერიკის შეერთებული შტატების პრეზიდენტმა ბარაკ ობამამ აღნიშნულ სამ შტატში საგანგებო მდგომარეობა გამოაცხადა, ქვეყნის პირველი პირის გადაწყვეტილებით, სტიქიით დაზარალებულ შტატებში მაშველების დამატებითი ჯგუფები გაიგზავნება.