,,თავისუფალი ზონის'' 2 წარმომადგენელი, მარიამ ბაშარული და ვაჟა მორგოშია, სუს-მა იძულების წესით დაკითხვაზე გადაიყვანა. ეს გადაწყვეტილება მიღებულ იქნა მას შემდეგ, რაც  მათ ორი დღის წინ სუს-ში დატოვეს შეტყობინება, რომ რამდენიმე დღის განმავლობაში საარჩევნო კამპანიაში მონაწილეობის გამო დაკითხვაზე ვერ მივიდოდნენ. დღეს მათ დაახლოებით 11:00 საათზე სახლში მიაკითხეს და შემდეგ ე.წ. მოდულის შენობაში სასამართლო განჩინების საფუძველზე გადაიყვანეს.

 მარიამ ბაშარულის ინტერესების დამცველის ირაკლი ზაქარეიშვილის თქნმით,   სახელმწიფო უსაფრთხოების სამსახური ცდილობს, რომ ამ ახალგაზრდებს ხელი შეუშალოს საარჩევნო  საქმიანობაში :  ”ორი დღის წინ მათ დატოვეს სუს-ში განცხადება, რომ საარჩევნო პერიპეტიების გამო რამდენიმე დღე ვერ ახერხებდნენ მოსვლას, თუმცა გაცვივდნენ და მოიტანეს განჩინება, მოიყვანეს იძულების წესით დაკითხვაზე. რაღაც სპეცოპერაციასავით ჩაატარეს, ჩაყარეს მანქანაში და გამოიყვანეს ეს ახალგაზრდები. მინდა ვთქვა, რომ სუსი ასრულებს ხელისუფლების დაკვეთას, რომ ამ ახალგაზრდებს ხელი შეუშალოს საქმიანობაში. დარწმუნებული ვარ 8 ოქტომბერს ეს მარაზმი დასრულდება”, – განაცხადა ირაკლი ზაქარეიშვილმა. 

,,თავისუფალი ზონის'' წევრები დაკითხვაზე 315-ე მუხლთან დაკავშირებით იმყოფებიან, რაც სახელმწიფო გადატრიალების მცდელობას გულისხმობს.ადვოკატები ვარაუდობენ, რომ უწყებაში თავისუფალი ზონის წარმომადგენლების გადაყვანა გავრცელებულ ფარულს სატელეფონო ჩანაწერს უკავშირდება, სადაც, სავარაუდოდ, მიხეილ სააკაშვილი და ნაციონალური მოძრაობის წევრები ფიგურირებენ .