დღეს თბილისის ცენტრში ინტენსიურად გადაადგილდებიან  პოლიციის მანქანები. ამასთან დაკავშირებით შინაგან საქმეთა სამინისტრო განმარტებას აკეთებს. უწყების ინფორმაციით აღნიშნული ღონისძიება დღეს დაგეგმილ აქციას და აქციის მონაწილეთა უსაფრთხოების დაცვის უზრუნველყოფას უკავშირდება:

"2 დღის წინ შსს-ში აქციის ორგანიზატორები იმყოფებოდნენ, რომლებმაც სამართალდამცველებს მიაწოდეს ინფორმაცია დღევანდელი შეკრების შესახებ. შესაბამისად, კანონის თანახმად, შსს უზრუნველყოფს მოქალაქეების უსაფრთხოებას. ეს არის კანონით განსაზღვრული ჩვეულებრივი სტანდარტული პროცედურა, რომელიც წინასწარ, ოფიციალურად დაგეგმილი და დაანონსებული დემონსტრაციებისა და შეკრებების დროს არის გათვალისწინებული. ასეთ შემთხვევებში, საზოგადოების და მათ შორის, ღონისძიებების მონაწილეთა უსაფრთხოების უზრუნველყოფის მიზნით, შს სამინისტრო ყოველთვის მოქმედებს „პოლიციის შესახებ“ საქართველოს კანონის მე-17 მუხლის თანახმად. აღნიშნულ უფლებამოსილებებს პოლიცია ახორციელებს „შეკრებებისა და მანიფესტაციების დროს საქართველოს შინაგან საქმეთა სამინისტროს მოსამსახურეთა ქცევის სახელმძღვანელო ინსტრუქციის დამტკიცების თაობაზე“ 2015 წლის 30 დეკემბრის საქართველოს შინაგან საქმეთა მინისტრის №1002 ბრძანების შესაბამისად, რომელიც დეტალურად აწესრიგებს შეკრებებისა და მანიფესტაციების მონაწილეთა უსაფრთხოებისა და უფლებების დაცვის მიზნით პოლიციელის მიერ განსახორციელებელ ქმედებებს." -ნათქვამია შსს-ს განცხადებაში..

,, ნაციონალურ მოძრაობის“ მხარდამჭერები ამ წუთებში ვარდების მოედანზე იკრიბებიან. 

წინასაარჩევნო შემაჯამებელი აქცია რამდენიმე წითში, 16:00 საათზე დაიწყება. ლიდერების მიმართვის შემდეგ, ვარდების მოედნიდან პარლამენტის მიმართულებით მშვიდობიან მსვლელობა გაიმართება.