ტელეკომპანია ,,ოდიშის'' პირდაპირ ეთერში გამართულ  გუშინდელ   დებატებზე დაწყებული კამათი გადაცემის ორ მონაწილეს შორის დღეს ბრიფინგითა და მკვეთრი განცხადებებით გაგრძელდა.  

ქ. ზუგდიდის საკრებულოს  მაჟორიტარი წევრობის  კანდიდატმა ნინო კვარაცხელიამ „საქართველოს პატრიოტთა ალიანსიდან “  პარტიის ოფისში გამართულ ბრიფინგზე ბოდიშის მოხდა მოითხოვა  თავისი კონკურენტისგან დავით ვერავასგან , რომელმაც ღია ეთერში განაცხადა, რომ იგი ტესტირებაში ჩაიჭრა და სწორედ ამ და არა სხვა მიზეზით  დაითხოვეს  სამსახურიდან. 

ნინო კვარაცხელიას  თქმით,    მერიის სოციალური სამსახურის წამყვანი სპეციალისტის თანამდებობა  მას სულ სხვა მოტივით დაატოვებინეს და აპელირება ტესტირების შედეგებზე სრული სიცრუეა – სინამდვილეში  მან წარმატებით გაიარა საჯარო მოხელეთა შესარჩევი ტესტირება და გამსვლელი, 33 ქულა მოიპოვა, თუმცა სამსახურის დატოვება მაინც მოუხდა.  მან  ბრიფინგზე წარმოადგინა  ცნობა, რომელიც,  მისი თქმით, ადასტურებს მის მიერ საატესტაციო-საკონკურსო გამოცდაზე მიღებულ ამ  შედეგს.

ნინო კვარაცხელიამ  განაცხადა, რომ მისმა კონკურენტმა ,, თავისუფალი დემოკრატებიდან"   ამ განცხადებით  შეურაცხყოფა მიაყენა მას და საჯაროდ  ბოდიშის მოხდა მოითხოვა მისგან .  ამასთან მოუწოდა დავით ვერავას დაინტერესდეს  ქალაქის მერიაში დასაქმებულთა ბიოგრაფიითა და მათი კვალიფიკაციით  და თავი ანებოს არარსებული კომპრომატების  ძიებას  „პატრიოტთა ალიანსის“ კანდიდატის წინააღმდეგ. 

ბრიფინგზე განცხადება გააკეთა  აგრეთვე ზუგდიდის მუნიციპალიტეტის გამგებლობის კანდიდატმა პარტიიდან გურგენ სართანიამ.  ,,ჩვენ  მსგავსი მეთოდებით ბრძოლას უფრო „ქართული ოცნების“ წარმომადგენლებისგან ვდელოდით, ვიდრე  „თავისუფალი დემოკრატებისგან“ – განაცხადა მან  და დასძინა, რომ   ალიანსი იღებს  ყველა გამოწვევას და დაამტკიცებს  საკუთარ სიმართლეს  ყველგან და ყოველთვის.