აფხაზეთის თვითგამოცხადებული რესპუბლიკის საგარეო საქმეთა მინისტრის მოვალეობის შემსრულებელმა ვიაჩესლავ ჩირიკბამ განაცხადა, რომ შექმნილ ვითარებაში ვერ ხედავს შესაძლებლობას, განაგრძოს მუშაობა საგარეო უწყების ხელმძღვანელის პოსტზე, და იმედი გამოთქვა, რომ აფხაზეთი არ შეიცვლის საგარეო პოლიტიკურ გეზს.
სამშაბათს გაკეთებულ ამ განცხადებას 21 სექტემბერს გამოეხმაურა თვითგამოცხადებული რესპუბლიკის პრეზიდენტის პრესსამსახური, რომლის თქმით, მინისტრთა კაბინეტის დაშლის შემდეგ ჩირიკბა აღარ დანიშნეს საგარეო საქმეთა მინისტრად. ამის უმთავრესი მიზეზი იყო მისი უარი, აფხაზეთის დელეგაციის შემადგენლობაში გამგზავრებულიყო დნესტრისპირეთის რესპუბლიკაში, „დამოუკიდებლობის დღისადმი“ მიძღვნილ ღონისძიებებში მონაწილეობის მისაღებად.
სოხუმის ხელისუფლების ხელმძღვანელის პრესსამსახურის თანახმად, უარი ჩირიკბამ იმით ახსნა, რომ მოლდავეთის მიერ მისი დეპორტაციის შემთხვევაში მას სირთულეები შეექმნებოდა ევროპის ქვეყნებში მგზავრობისას.
შეგახსენებთ, 1 სექტემბერს კიშინიოვის აეროპორტში მოლდოვას სასაზღვრო პოლიციამ დააკავა და დეპორტით გამოისტუმრა ე.წ. აფხაზეთის საგარეო საქმეთა მინისტრის მოადგლე ოლეგ არშბა, რომელიც, აფხაზური მედიის ცნობით, სამუშაო ვიზიტით მიემგზავრებოდა დნესტრისპირეთში რესპუბლიკის ხელმძღვანელობის მიწვევით. ეს მოლდოვადან სეპარატისტული აფხაზეთის წარმომადგენლების დეპორტირების პირველი შემთხვევა არ ყოფილა – ზუსტად ერთი წლის წინათб 2015 წლის სექტემბერში მოლდოვის ხელისუფლებამ აეროპორტში რეისიდან მოხსნა აფხაზეთისა და სამხრეთ ოსეთის დელეგაციები, რომლებიც დნესტრისპირეთის თვითგამოცხადებული რესპუბლიკის დედაქალაქ ტირასპოლში ოფიციალურ ღონისძიებაზე იმყოფებოდნენ. უკან დაბრუნებისას კიშინიოვის აეროპორტში მათი რეისი გააჩერეს, დელეგაციის დეპორტირება მოახდინეს და მოლდოვაში 10 წლით შესვლა აუკრძალეს.