საქართველოს პრემიერმინისტრი შეერთებულ შტატებში იმყოფება, დღეს იგი გაეროს გენერალურ მდივანს ხვდება. დღესვეა დაგეგმილი პირისპირ შეხვედრა ათასწლეულის გამოწვევის კორპორაციის აღმასრულებელ დირექტორთან, ასევე გერმანიის საგარეო საქმეთა მინისტრთან.
გიორგი კვირიკაშვილი უკვე გამოვიდა სიტყვით გაეროში საქართველოს მთავრობის მიერ ორგანიზებულ შეხვედრაზე. მან ისაუბრა საქართველოს მიერ მიღწეულ წარმატებებსა და სამომავლო გეგმებზე ელექტრონული მმართველობისა და საჯარო ტრანსფარენტული მომსახურების მიმართულებით.
"ჩვენი მიზანია ყველა დონეზე ეფექტიანი, ანგარიშვალდებული და ინკლუზიური ინსტიტუტების შექმნა“ – ეს ევროკავშირის მოთხოვნების შესრულებისკენ მიმართული ჩვენი ძალისხმევის არსებითი ნაწილია.
ამ სფეროში ჩვენ დიდი პროგრესი გვაქვს, საქართველოს ეროვნული კონცეფცია იანვარში იქნება მიღებული ჩვენი მთავრობის ოთხპუნქტიანი რეფორმის ფარგლებში, რომელიც მიზნად ისახავს ეკონომიკის შემდგომ მოდერნიზაციას.ძირითადი აქცენტი კეთდება ღია მმართველობისა და საჯარო მომსახურების მოდერნიზაციაზე, რაც ბიუროკრატიული ბარიერების შემცირებით, ეფექტიანობის გაზრდით, გამჭვირვალობით, საკანონმდებლო და გადაწყვეტილების მიღების პროცესებში საზოგადოების ჩართულობის ხელშეწყობით ხორციელდება," – განაცხადა გიორგი კვირიკაშვილმა.