ზუგდიდის დემოკრატიული ჩართულობის ცენტრში წინასაარჩევნო საჯარო დისკუსია გაიმართა.
შეხვედრის მონაწილეებს თავიანთი პარტიების სოციალურ – ეკონომიკური პროგრამები გააცნეს „ქართული ოცნება – ერთიანი საქართველოს“, ერთიანი ნაციონალური მოძრაობის, თავისუფალი დემოკრატებისა და პოლიტიკური გაერთიანება „გირჩის“ წარმომადგენლებმა.
დისკუსიაში მონაწილე ადგილობრივი მედიის, საზოგადოებისა და არასამთავრობო სექტორის წარმომადგენლებმა გამოთქვეს მოსაზრებები და შენიშვნები ამ პროგრამების გარშემო.
მათ ხაზი გაუსვეს, რომ მიესალმებიან არჩევნებში მონაწილე პოლიტიკურ ძალებს შორის ჯანსაღ კამათსა და დისკუსიას, შეჯიბრებას კარგად გააზრებული და რეალური პროგრამებით. იყვნენ წინასაარჩევნო დაპირებების მიმართ სკეპტიკურად განწყობილი ადამიანებიც, რომელნიც ვარაუდობენ, რომ ეს პროგრამები შეიძლება ქაღალდზევე დარჩეს.
დისკუსია გაიმართა ეკონომიკური პოლიტიკის კვლევის ცენტრის პროექტის „ინფორმირებული ამომრჩეველი – საარჩევნო ანგარიშვალდებულების გასაუმჯობესებლად“ ფარგლებში.
პროექტი ხორციელდება აშშ საელჩოს მხარდაჭერით და მიზნად ისახავს საარჩევნო ანგარიშვალდებულების უზრუნველყოფას ამომრჩევლების ინფორმირების, ზოგადად საზოგადოებისათვის და რეგიონული მოსახლეობისათვის წინასაარჩევნო დაპირებების და შეთავაზებების, ასევე, წამყვანი პოლიტიკური პარტიების მიერ წამოწეული პოლიტიკური შეხედულებების შესახებ დროული ინფორმაციისა და პროფესიული შეფასების მიწოდების გზით.