წლევანდელი რთველი შესაძლოა კახეთში საპროტესტო ტალღის მიზეზი გახდეს. რეგიონში უკვე აქტიურად მიმდინარეობს ყურძნის კრეფა და, შესაბამისად, ჩამბარებელ პუნქტებთან რიგები დგას, რაც გლეხების მხრიდან უკმაყოფილების მიზეზია. სოფლის მეურნეობის მინისტრი ლევან დავითაშვილი თელავში იმყოფებოდა, სადაც რთველი 2016-ის საკოორდინაციო შტაბის  წევრებს შეხვდა და რთველის მიმდინარეობის შესახებ დეტალური ინფორმაცია მოისმინა. მინისტრმა რამდენიმე ღვინის საწარმოც დაათვალიერა და ადგილზე გაეცნო ყურძნის გადამუშავების პროცესს. ლევან დავითაშვილის შეფასებით, რთველი 2016 ორგანიზებულად და შეუფერხებლად მიმდინარეობს.  

„წელს, მოსავლის დაბინავებას  პრობლემა არ შეექმნება და არცერთ მევენახეს ჩაუბარებელი ყურძენი არ დარჩება. ამ დროისთვის უკვე გადამუშავებულია 18 ათას ტონაზე მეტი ყურძენი. რთველი აქტიურ, ფაქტობრივად პიკურ ფაზას უახლოვდება. საამისოდ სრულად მობილიზებულია რთველის საკოორდინაციო შტაბი, მზად არის  ტექნიკური საშუალებები და  იმედი გვაქვს, რომ წლევანდელი რთველიც ორგანიზებულად ჩაივლის და  წარმატებული იქნება“,  – აღნიშნა სოფლის მეურნეობის მინისტრმა, ლევან დავითაშვილმა.თუმცა, მევენახეების მთავარი პრობლემა ისევ ფასია, რომელიც წელს რქაწითელზე 0,80 ლარს ხოლო საფერავზე 1 ლარს შეადგენს და ეს მთავრობის სუფსიდიის ჩათვლით.რთველი 2016 აქტიურ ფინალურ ფაზაში შევიდა. პროცესი მომდევნო კვირიდან გურჯაანისა და თელავის მუნიციპალიტეტებში გაგრძელდება.