,,პატრიოტთა ალიანსის’’ ზუგდიდის ოფისში ქალაქ ზუგდიდის მაჟორიტარობის კანდიდატმა პარტიიდან  ოთარ ჭითანავამ გამართა სპეციალური ბრიფინგი, სადაც  საუბარი დაიწყო ,,ზუგდიდობის დღესასწაულზე ქართული ოცნების მაჟორიტარობის კანდიდატის მერაბ ქვარაიასა და ერთიანი ნაციონალური მოძრაობის კანდიდატის სანდრა რულოვსის თბილ მისალმების’’ შეფასებით.

ოთარ ჭითანავას შეფასებით, ამ ჟესტით მერაბ ქვარაიამ ზუგდიდობის დღესასწაული ნაციონალური მოძრაობისა და ქართული ოცნების შერიგების დღედ გამოაცხადა.

პატრიოტთა ალიანსის მაჟორიტარობის კანდიდატმა აგრეთვე განაცხადა, რომ შუამავალი პირებისგან აქვს ინფორმაცია, რომ  სამეგრეო – ზემო სვანეთის გუბერნატორს ლევან შონიას აქვს სურვილი მოახსნევინოს მას თავისი კანდიდატურა ,,ქართული ოცნების’’ კანდიდატის მერაბ ქვარაიას სასარგებლოდ.

ბრიფინგზე განცხადება გააკეთა  ზუგდიდის რაიონის  გამგებლობის კანდიდატმა ,,პატრიოტთა ალიანსიდან“ გიზო სართანიამაც, მან ისაუბრა  მისი ოჯახის წევრებზე გამუდმებული ზეწოლის შესახებ ,,ქართული ოცნების’’ მხრიდან,  და ამ კონტექსტში შეეხო გამგეობის შენობაში მომხდარ  ინციდენტს მასა და ქართული ოცნების მიერ ზუგდიდის რაიონის მაჟორიტარი დეპუტატობის კანდიდატად დასახელებული ედიშერ თოლორაიას სიძეს შორის.   მან აღნიშნა აგრეთვე, რომ ადგილი აქვს მისი საარჩევნო პლაკატების ჩამოხევას ზუგდიდის ქუჩებში.

ბრიფინგის შემდეგ ჟურნალისტებმა ბრალდებების ადრესატებს მიმართეს – გუბერნატორმა ლევან შონიამ ამ თემაზე საუბარი არ ისურვა, კატეგორიულად უარყო რომ საარჩევნო პროცესებში ერევა  და  განაცხადა, რომ აბსურდულ ბრალდებებზე კომენტარს არ გააკეთებს.

მერაბ ქვარაიამ პატიროტთა ალიანსის’’ ბრალდებების პასუხად  განაცხადა , რომ ის არადროს შეეგუება ,,ნაციონალურ მოძრაობას’’ და რომ მათი მმართველობის დროს ყველაზე რეპრესირებული მისი ოჯახი იყო.