ნაძალადევში თავისუფალი დემოკრატების მაჟორიტარობის კანდიდატმა ლევან მელიქიამ კანდიდატურა ,,ქართული ოცნების'' კანდიდატის სასარგებლოდ მოხსნა.
მელიქიას საარჩევნო შტაბში ადასტურებენ, რომ მან გადაწყვეტილება სოფო კილაძის სასარგებლოდ მიიღო, თუმცა დამატებით დეტალებზე არ საუბრობენ.
„ბევრი ფიქრისა და გაანალიზების შემდეგ, გადაწყვეტილება მივიღე მოვხსნა ჩემი კანდიდატურა თბილისის მე-17 საარჩევნო ოლქში. ეს ჩემი მშობლიური უბანია, სადაც ყველა მიცნობს და ყველამ იცის, რომ „ქართული ოცნების“ მიმართ კრიტიკულობით არასოდეს გამოვირჩეოდი, რომ მინდოდა ნაძალადევის რაიონის განვითარებაში ჩემი წვლილი შემეტანა. გარკვეული მიზეზებისა და პარტიაში განვითარებული მოვლენების გამო ვხსნი ჩემს კანდიდატურას "ქართული ოცნების" კანდიდატის – სოფო კილაძის სასარგებლოდ“, – ნათქვამია ლევან მელიქიას განცხადებაში
მელიქიას გადაწყვეტილება მოულოდნელი აღმოჩნდა პარტიის ხელმძღვანელობისთვის. გიორგი ცაგარეიშვილის თქმით, იგი, როგორც საარჩევნო შტაბის ხელმძღვანელი, აქტიურად თანამშრომლობდა ნაძალადევის რაიონის შტაბთან, თუმცა კანდიდატის განწყობა ,,ქართული ოცნებისადმი'' მისთვის უცნობი იყო.