მთავრობის ადმინისტრაციის შენობასთან დილიდან მიმდინარეობს სოციალურად დაუცველთა აქცია. ისინი პრემიერთან შეხვედრას მოითხოვდნენ და ამასთან დაკავშირებით ადმინისტრაციაში განცხადების ჩაბარებას გეგმავდნენ.
განცხადების ჩაბარების მცდელობის პროცესში ვითარება დაიძაბა – დაცვამ აქციის მონაწილეებს შენობაში შესვლის უფლება არ მისცა, რასაც ადგილზე ინციდენტი მოჰყვა.
სამართალდამცავებმა ”თავისუფალი თაობის” ხელმძღვანელი ლადო სადღობელაშვილი დააკავეს.
შინაგან საქმეთა სამინისტროს განმარტებით,მისი დაკავება, „ადმინისტრაციულ სამართალდარღვევათა კოდექსის“ 173-ე მუხლით მოხდა, რაც პოლიციელთა მიმართ დაუმორჩილებლობას გულისხმობს.