ექსპერტები იენს სტოლტენბერგისა და ნატო-ს ელჩების ვიზიტს საპარლამენტო არჩევნების წინ მნიშვნელოვან მოვლენას უწოდებენ და არ გამორიცხავენ, რომ ხელისუფლებამ გარკვეული რეკომენდაციებიც მიიღოს ჩრდილო ატლანტიკური საბჭოსგან არჩევნების დემოკრატიულად ჩასატარებლად.
"ეს ვიზიტი ძალიან მნიშვნელოვანია თავისი შინაარსითაც და იმ დროითაც, რა დროსაც ის ხორციელდება. ჩვენი ქვეყანა შედის პოლიტიკურად ძალიან მგრძნობიარე წინასაარჩევნო პერიოდში. იზრდება გარეშე საფრთხეები და გამოწვევები. ასევე არის ძალიან ბევრი შეკითხვები საზოგადოებაში, რამდენად ეფექტურად მიდის საქართველო ჩრდილოატლანტიკური ინტეგრაციის გზაზე. ამ ყველაფერზე იქნება ვიზიტის დროს საუბარი,“-განაცხადა ამერიკის მაკკეინის საერთაშორისო ლიდერობის ინსტიტუტის წარმომადგენელმა ბათუ ქუთელიამ.
ექსპერტების აზრით, ვიზიტისას გაჟღერებული იქნება კონკრეტული მესიჯები, რომელიც შეეხება პრესის თავისუფლებას, ასევე საპარლამენტო არჩევნებს.
„მკაფიო გზავნილები იქნება თვითონ არჩევნების დამოუკიდებლობის ხარისხთან და რა თქმა უნდა პრესის თავისუფლებასთან დაკავშირებით. ეს არის ნატო-ს მთავარი პრინციპები. ყველაზე კარგი ის არის, რომ ისინი თავის მოლოდინებს გააჟღერებენ. რამდენად გაითვალისწინებს ამას ჩვენი ხელისუფლება ეს უკვე სხვა არის,“-განახადა საქართველოს სტრატეგიისა და საერთაშორისო ურთიერთობების კვლევის ფონდის ექსპერტმა ნოდარ ხარშილაძემ რუსთავი 2 – თან საუბარში