ცოტა ხნის წინ ვაკეში, ფალიაშვილისა და თაქთაქიშვილის ქუჩების გადაკვეთაზე ახალგაზრდა ბიჭი ჩაცხრილეს, არაოფიციალური ინფორმაციით სახელდება მოკლულის ვინაობა – სოსო ჯოხაძე, რომელიც ნასამართლევია და მისი სახელი არაერთ გახმაურებულ კრიმინალურ საქმეში ფიგურირებს.
თვითმხილველები საუბრობენ 5-6 გასროლაზე, რომელიც ინცინდენტის მომენტში გაიგონეს. მათი თქმით, გაჩერებულ მანქანაში, შავი ფერის ჯიპში მჯდომ მამაკაცს ერთმა პირმა ესროლა და ადგილიდან მიიმალა. თავდამსხმელს სახეზე მაისური ჰქონდა მოხვეული. ახალგაზრდა ადგილზევეა გარდაცვლილი,ხოლო მის გვერდით მჯდარი კიდევ ერთი პირი დაჭრილია და საავადმყოფოშია გადაყვანილი.
ჯერჯერობით არ დასტურდება გავრცელებული ინფორმაცია თავდამსხმელის დაკავების შესახებ – შინაგან საქმეთა სამინისტროს მომხდართან დაკავშირებით კომენტარი ამ დრომდე არ გაუკეთებია.
ამასობაში კი თბილისში ვრცელდება მითქმა – მოთქმა, რომ მოკლული სწორედ ის სოსო ჯოხაძეა , რომელიც იუსტიციის მინისტრის თეა წულუკიანის ბავშვობის მეგობარია და მასთან ერთად ფიგურირებს ფოტოებზე, რომელიც კრიმინალურ ავტორიტეტებთან იუსტიციის მინისტრის ახლო კავშირის მამხილებელი დოკუმენტის სახით არაერთხელ გამოქვეყნებულა მედიაში.