მმართველ გუნდში გაკეთებულ განცხადებებს , რომ პრეზიდენტის მიერ წარდგენილ მოსამართლეობის კანდიდატებზე მსჯელობა,იურიდიული კომიტეტის ფორმატში  6 სექტემბერს გაიმართება,  პრეზიდენტის საპარლამენტო მდივანი ანა დოლიზე მწვავე კრიტიკით ეხმაურება. – მსჯელობას 6 სექტემბერს, სავარაუდოდ, მხოლოდ ფორმალური ხასიათის იქნება და საკანონმდებლო ორგანო  კანდიდატურების კენჭისყრას არჩევნებამდე ვერ მოასწრებს  –  ნათქვამია მის მიერ დღეს გაკეთებულ განცხადებაში. 

 

„სამწუხაროა, რომ ჩვენ დღეს კიდევ ერთხელ ვართ მოწმენი საქართველოს პარლამენტის ზერელე და უპასუხისმგებლო დამოკიდებულებისა თავისი უმნიშვნელოვანესი ფუნქციისადმი,  უზრუნველყოს ქართველი ხალხისთვის მართლმსაჯულების უფლება და დროულად დანიშნოს უზენაესი სასამართლოს მოსამართლეები. არ უნდა დაგვავიწყდეს, რომ პირველ რიგში ამ უპასუხისმგებლო დამოკიდებულებისაგან დაზარალებული არის საქართველოს მოსახლეობა, რომელსაც ეზღუდება ეფექტური მართლმსაჯულების უფლება“, – განაცხადა ანა დოლიძემ.

 

როგორც ცნობილია, საქართველოს პრეზიდენტმა პარლამენტს უზენაესი სასამართლოს მოსამართლეობის კანდიდატები უკვე მეორედ წარუდგინა. თავდაპირველად გიორგი მარგველაშვილმა პარლამენტს ანა დოლიძის, თამარ ლალიაშვილისა და ნონა თოდუას კანდიდატურები შესთავაზა, თუმცა საკანონმდებლო ორგანომ მათ მხარი არ დაუჭირა. პრეზიდენტი პარლამენტის გადაწყვეტილებას არ დაეთანხმა და მას აღნიშნულ თანამდებობაზე ხელმეორედაც იგივე – თამარ ლალიაშვილისა და ნონა თოდუას კანდიდატურები წარუდგინა. ასევე უზენაესი სასამართლოს მოსამართლის თანამდებობაზე გიორგი მარგველაშვილმა საკანონმდებლო ორგანოს უშიშროების საბჭოს მდივნის მოადგილის, ლევან ბოძაშვილის კანდიდატურაც შესთავაზა. პრეზიდენტის გარემოცვა თვლის, რომ პარლამენტი მოსამართლეთა კანდიდატურების დამტკიცებას ხელოვნურად აჭიანურებს.