წუხელ 19:20 საათზე ამალი-დევდორაკის ხეობაში ღვარცოფი მოვარდა, რაც ძლიერმა წვიმამ და მყინვარის ზონაში დაგროვებული წყლის მასის ჩამოსკდომამ განაპირობა.
სახელმწიფო უსაფრთხოებისა და კრიზისების მართვის საბჭოს აპარატის ინფორმაციით, როგორც კი დევდორაკიდან სპეციალისტების მიერ მოწოდებული შეტყობინება მოვიდა, შსს-ს საპატრულო პოლიციამ დაუყოვნებლივ დაიწყო შემთხვევის ადგილიდან მოქალაქეთა ევაკუაცია. პრევენციის მიზნით, ჩაიკეტა საავტომობილი გზა თბილისი-მცხეთა-სტეფანწმინდა-ლარსის 136-137-ე კილომეტრზე და დარიალის სასაზღვრო-გამშვები პუნქტი.
საბედნიეროდ, ქვა-ტალახოვანმა მასამ საქართველოს სამხედრო გზამდე ვერ ჩააღწია და მდინარის კალაპოტში დაილექა.
,,ამ დროისთვის ამალი-დევდორაკის ხეობაში ღვარცოფის საშიშროება აღარ არსებობს, – აცხადებენ სახელმწიფო უსაფრთხოებისა და კრიზისების მართვის საბჭოს აპარატში, თუმცა გრძელდება გზის აღნიშნულ მონაკვეთზე გზების დეპარტამენტის მიერ დაწესებული რეჟიმი და ავტომობილების გადაადგილება მხოლოდ 06.00 საათიდან 20:00 საათამდეა ნებადართული