ტელეკომპანია „ბიბისის“ ცნობით, თურქული სატანკო შენაერთები სირიის ჩრდილოეთში, თურქეთის საზღვრიდან ერთი კილომეტრის დაშორებით მდებარე ჯარაბლუსის რაიონის ტერიტორიაზე შევიდნენ. ქალაქს „ისლამური სახელმწიფო“ 2013 წლიდან აკონტროლებს.
სააგენტო „ანადოლუს“ ცნობით, დღეს იქ თურქეთმა დაჯგუფება „ისლამური სახელმწიფოს“ წინააღმდეგ სახმელეთო ოპერაცია დაიწყო. ოპერაციაში სახელწოდებით „ევფრატის ფარი“ 20-მდე თურქული ტანკი მონაწილეობს.
სირიელი ქურთები ამ ოპერაციას ქვეყნის ოკუპაციის მცდელობად აფასებენ. ,,თურქეთი ცდილობს თავისი ირიბი ოკუპაცია პირდაპირ ოკუპაციად აქციოს. მოვითხოვთ მისგან შეწყვიტოს სირიაში მოქმედი ტერორისტული დაჯუფებების მხარდაჭერა და დაუყოვნებლივ გაიყვანოს ჯარების ქვეყნის ტერიტორიიდან, წინააღმდეგ შემთხვევაში ნებისმიერ ფასად გამოვაძევებთ მათ ჩვენი ტერიტორიიდან – აცხადებს ქურთების პარტია ,,დემოკრატიული კავშირის" ლიდერი საფრანგეთში ჰალიდ ისა.
თურქეთის შინაგან საქმეთა მინისტრმა ეფკან ალამ დღეს გააკეთა განცხადება, რომ ოპერაცია სირიის ჩრდილოეთში ,,ისლამური სახელმწიფოს'' მხრიდან მომავალი საფრთხის სრულ ლიკვიდაციამდე გაგრძელდება.
მცირე ხნით ადრე პრეზიდენტმა რეჯებ ტაიპ ერდოღანმა განაცხადა, რომ მისი ქვეყანა მზად არის სირიის საკითხში ითანამშრომლოს როგორც მთელ საერთაშორისო კოალიციასთან, ისე რუსეთთან.