საქართველოს პრემიერ-მინისტრმა გიორგი კვირიკაშვილმა საგარეო საქმეთა მინისტრ მიხეილ ჯანელიძეს დაავალა, „სასწრაფოდ დაამყაროს კომუნიკაცია იტალიასთან, რომ მიწისძვრის შედეგების აღმოფხვრაში დახმარების გაწევის პროცესში საქართველომაც შეიტანოს მოკრძალებული წვლილი“.
პრემიერ-მინისტრმა იტალიაში მომხდარ მიწისძვრასთან დაკავშირებით მთავრობის სხდომაზე ისაუბრა და მსხვერპლის გამო იტალიის მთავრობას და იტალიელ ხალხს მიუსამძიმრა.
„სულ ცოტა ხნის წინ მაცნობეს, რომ იტალიაში, პერუჯასთან ახლოს მოხდა ძალიან ძლიერი მიწისძვრა. არის მსხვერპლიც, ასევე მნიშვნელოვანი ნგრევა.
მინდა სამძიმარი გამოვუცხადო იტალიის მთავრობას და ხალხს ამ ტრაგიკული ფაქტის გამო. მინდა საგარეო საქმეთა მინისტრს ვთხოვო, სასწრაფოდ კომუნიკაცია დაამყაროს იტალიასთან, რომ შესაძლო დახმარების გაწევის პროცესში საქართველომაც მიიღოს მოკრძალებული წვლილი“, -განაცხადა კვირიკაშვილმა