ლახავს თუ არა გამუდმებული გამოცდები და ტესტირება პედაგოგების ავტორიტეტს? – სპეციალისტები და პოლიტიკოსები პრემიერის ინიციატივაზე მსჯელობენ სპეციალისტები პედაგოგების ტესტირებასთან დაკავშირებით პრემიერის ინიციატივას არ იზიარებენ. მათი აზრით გამოცდები აუცილებელია მასწავლებელთა კვალიფიკაციისთვის. ისინი არ გამორიცხავენ, რომ ეს მხოლოდ წინასაარჩევნო კამპანიის ნაწილი იყოს.
“მინისტრს და პრემიერ მინისტრს უნდა შეეთავაზებინათ ამ სისტემის რეფორმირების საკითხი, რათა ჩვენ შეგვძლებოდა განგვეხილა ეს ინიციატივა სწორედ განათლების რეფორმის კონტექსტში. დღევანდელი შემოთავაზებით რაც გაჟღერდა, მისი განხილვა შესაძლებელია მხოლოდ და მხოლოდ წინა საარჩევნო კონტექსტში,“ – განაცხადა რუსთავი 2 – თან საუბარში განათლების საკითხების მკვლევარმა, სამოქალაქო ინტეგრაციისა და ეროვნებათშორისი ურთიერთობების ცენტრის თავმჯდომარემ შალვა ტაბატაძემ.
საპარლამენტო უმრავლესობა იზიარებს პრემიერის განცხადებას პედაგოგთა ტესტირებასთან დაკავშირებით და მიაჩნიათ, რომ მასწავლებელს არ უნდა უწევდეთ გამუდმებით გამოცდების ჩაბარება. პრემიერის აზრს იზიარებენ რესპუბლიკელებიც, თუმცა განათლების სისტემის სიღრმისეული რეფორმების აუცილებლობაზეც საუბრობენ.
ოპოზიციის ნაწილი კი განათლების სფეროს სპეციალისტების მსგავსად ფიქრობს, რომ გამოცდების გაუქმება კვალიფიკაციას შეამცირებს. მათი აზრით, ეს განცხადება წინასაარჩევნოდ პედაგოგების გულის მოსაგებად და მათი ხმების მოსაპოვებლად გაკეთდა. ამასთან არის მოსაზრება, რომ ,“სასერტიფიკაციო გამოცდები არ უნდა წარმოადგენდეს დამსჯელ მექანიზმს პედაგოგისთვის. და არ შეიძლება იყოს განხილული როგორც ერთადერთი გზა პროფესიული განვითარებისთვის ,“ – ამის შესახებ ერთიანი ნაციონალური მოძრაობის წევრმა მარიამ რამინაშვილმა. განაცხადა
შეგახსენებთ, პრემიერმა გიორგი კვირიკაშვილმა ბათუმში, პარტიის მაჟორიტარი დეპუტატობის კანდიდატების წარდგენისას განაცხადა, არ შეიძლება პედაგოგთა გამუდმებული გამოცდები და ტესტირებები.