სოხუმური გამოცემა ,,ნუჟნაია გაზეტა“  არაოფიციალურ წყაროებზე დაყრდნობით აქვეყნებს ინფორმაციას პარტია ,,ედინაია აბხაზიას პოლიტსაბჭოს მდივნის ირინა დოჩიას გამტაცებლებისა და გატაცების გარემოებათა  შესახებ.

,,სოხუმიდან 2 ივლისს გატაცებული ირინა დოჩია  საქართველოს ტერიტორიაზე გადაიყვანეს და იქ ყავდათ დაკავებული 45 დღის განმავლობაში.  მისი გატაცების დამკვეთი საქართველოს დანაშაულებრივი სამყაროს წარმომადგენლები იყვნენ, ხოლო შემსრულებლები – აფხაზი კრიმინალები. ქალბატონის მიმართ რაიმე ძალადობრივი ქმედება არ განხორციელებულა. გატაცება მოხდა გამოსასყიდის მიღების მიზნით, გამტაცებლები ითხოვდნენ 1,5 მილიონ ევროს. '' – იუწყება გაზეთი. 

დოჩიას საქმის გამოძიებას თვენახევრის განმავლობაში ახორციელებდა  აფხაზეთის სახელმწიფო უშიშროების სამსახური  გენერალურ პროკურატურასთან ერთად , როცა დადგინდა, რომ იგი საქართველოში ყავდათ დაკავებული, აფხაზეთის სახელმწიფო უშიშროების  სამსახურმა დახმარებისთვის მიმართა რუს კოლეგებს, რომელნიც თავის მხრივ დაუკავშირდნენ საქართველოს სამართალდამცავ უწყებებს და მათ შორის შემდგარი მოლაპარაკებების შემდეგ დოჩია განთავისუფლებულ იქნა. – აცხადებს აფხაზეთის სახელმწიფო უშიშროების თავმჯდომარის მოადგილე ვლადიმერ არლანი. 

გაზეთის ცნობით, არლანი თავს იკავებს დეტალების გახმაურებისაგან გამოძიების ინტერესების გათვალისწინებით, თუმცა ამბობს, რომ დაზუსტებულია გამტაცებელთა ვინაობა და კონკრეტული მისამართი, სადაც ქალბატონს იძულებით ამყოფებდნენ. 

თბილისში ამ  ფაქტთან დაკავშირებით კომენტარი ჯერ არ გაკეთებულა.