გამარჯვების შემთხვევაში, პირობას ვდებ, რომ რწმენით და სიმართლით ვემსახურები ჩემს ქვეყანას, – ამის შესახებ "ქართული ოცნების" მაჟორიტარი დეპუტატობის კანდიდატმა ვაკის მესამე ოლქში ზაზა ხუციშვილმა ჟურნალისტებს განუცხადა.
მისი თქმით, ის სფეროები, რომელშიც მას ჰქონდა გამოცდილება, ფართოა. "ეს არის კულტურის, სპორტის სფერო. ეს გადაწყვეტილება ჩემთვის არ იყო მარტივი, რადგან ვარ მოქმედი და აქტიური მუსიკოსი, მაგრამ ვთვლი, რომ ამ ასპარეზზე ქვეყნის მსახურება არის ძალიან დიდი პატივი. ჩემი გამარჯვების შემთხვევაში, პირობას ვდებ, რომ რწმენით და სიმართლით ვემსახურები ჩემს ქვეყანას", – აღნიშნა ზაზა ხუციშვილმა.
მისივე თქმით, ის არის აქტიური მონადირე, რომელიც ყოველთვის იცავს ნადირობის კანონებს და ამ მიმართულებითაც შეუძლია აქტიური იყოს. "გარემოს დაცვის საქმეებიც მოსაგვარებელია", – განაცხადა ხუციშვილმა.
პარტია „ქართულმა ოცნებამ“ გუშინ თბილისის მაჟორიტარი დეპუტატობის კანდიდატები წარადგინა. კანდიდატები მთაწმინდის პარკში გამართულ ღონისძიებაზე თავად პრემიერ-მინისტრმა გიორგი კვირიკაშვილმა დაასახელა. ვაკეში, მე-2 ოლქში – ბიძინა გეგიძე. ვაკეში, მე-3 ოლქში – ზაზა ხუციშვილი იყრის კენჭს.