საპარლამენტო ბიუროს გუშინდელი სხდომა, სადაც ე.წ. უბლოკო სტატუსისა და ქვეყნის დასავლურ კურსთან დაკავშირებით კონსტიტუციაში ჩანაწერზე უნდა ემსჯელათ – კვორუმის არარსებობის გამო გადაიდო. საპარლამენტო უმრავლესობა სხდომაზე გამოუცხადებლობის საარჩევნო პარტიული ღონისძიებით ხსნის და კატეგორიულად უარყოფს მის მიზანმიმართულად ჩაშლას, თუმცა როგორც პარლამენტის თავმჯდომარე დავით უსუფაშვილი აცხადებს, მმართველ პარტიას ოფიციალურად ამის შესახებ საორგანიზაციო კომიტეტში შეტყობინება არ გაუგზავნია.
უმრავლესობის არგამოცხადებამ გააძლიერა ეჭვი, რომ ,,ქართულ ოცნებას'' დიდად არ ეხატება გულზე არც ბურჯანაძის და არც უსუფაშვილის აქტიურობა და გუშინდელი ბიუროს სხდომის ჩაშლა ხელოვნურად მოხდა. მით უფრო, რომ ცალკეულ დეპუტატებს მედიასთან საუბარში პირდაპირ უტქვამთ, რომ საპარლამენტო უმრავლესობა არცერთ ინიციატივას არ ეთანხმება, რადგან ე.წ. "უბლოკო სტატუსის" შესახებ საზოგადოებაში მოთხოვნა არ არსებობაზე საუბრობს, თუმცა ასევე არ აპირებს დავით უსუფაშვილის ინიციატივის მხარდაჭერას.