პრეზიდენტის ადმინისტრაციაში ვლადიმერ ბედუკაძის პარტია ცენტრისტების სარეკლამო რგოლს აფასებს როგორც ანტიკონსტიტუციურს. პრეზიდენტის პოზიცია ამის შესახებ მისმა მრჩეველმა კახა კოჟორიძემ გაახმოვანა.
"საქართველოს პრეზიდენტი მიესალმება იმ ერთიანობას და მიუღებლობას, რაც მთლიანად ქართულმა საზოგადოებამ, პოლიტიკურმა სპექტრმა და მმართველმა პოლიტიკურმა ძალამ დააფიქსირა ამ კლიპის წინააღმდეგ.
"მთლიანად ეს ამბავი და ქართული საზოგადოების პოზიცია მიანიშნებს, იმას რომ ჩვენ სწორად გვაქვს გააზრებული სიტყვის თავისუფლების და პოლიტიკური საქმიანობის თავისუფლების მნიშვნელობა და ის, რომ ეს არ არის შეუზღუდავი. განსაკუთრებულ შეთხვევაში ის შეიძლება შეიზღუდოს. ამ შემთხვევაში საქმე ნამდვილად გვაქვს განსაკუთრებული შემთხვევასთან იმიტომ, რომ საქართველოს კონსტიტუციის პირველივე მუხლის პირველივე წინადადება ამბობს, რომ საქართველო არის დამოუკიდებელი, ერთიანი და განუყოფელი სახელმწიფო.
"როდესაც ერთ-ერთი პოლიტიკური პარტია ამბობს, რომ ოკუპანტის ჯარებს დააკანონებს რა თქმა უნდა ეს არის საქართველოს დამოუკიდებლობისა და სუვერენიტეტის წინააღმდეგ მიმართული ქმედება და პოზიცია. ასეთ დროს საქართველოს პრეზიდენტი და თითოეული მოქალაქე იქნება ერთიანი ამ პოზიციაში,"- განაცხადა პრეზიდენტის მრჩეველმა კახა კოჟორიძემ.