დღეს პარლამენტის ბიუროს სხდომას წარედგინება ნინო ბურჯანაძისა და მოქალაქეთა საინიციატივო ჯგუფის წინადადება საქართველოსთვის ე. წ. უბლოკო სტატუსის მინიჭების შესახებ.
ანალიტიკოსების შეფასებით, ე.წ. უბლოკო სტატუსი ქვეყნის ევროინტეგრაციისკენ მიმავალ ხანგრძლივ გზაზე უარის თქმას ნიშნავს, რაც დაუშვებელია.
“ხაზი გადაესმება ბოლო 15 წლის საკმაოდ ინტენსიურ ნამუშევარს, იმ განცხადებას, რომ საქართველო აუცილებლად გახდება ნატო-ს წევრი და ყველა იმ ძალისხმევას, რომელიც საქართველომ გააკეთა დასავლეთთან ინტეგრაციის მიმართულებით,“ – განაცხადა საქართველოს სტრატეგიისა და საერთაშორისო ურთიერთობების კვლევის ფონდის ექსპერტმა ნოდარ ხარშილაძემ.
როგორც 12 აგვისტოს გამართულ პრესკონფერენციაზე გახდა ცნობილი, თავის მხრივ პარლამენტის თავმჯდომარის დავით უსუფაშვილი გამოდის კიდევ ერთი ინიციატრივით, რომ კონსტიტუციის პრეამბულას, სადაც საუბარია, რა სურს ქართველ ხალხს, დაემატოს ფრაზა: ”დავიმკვიდროთ სრულფასოვანი ადგილი დემოკრატიული სახელმწიფოების უსაფრთხოების და თანამშრომლობის ევროატლანტიკურ სისტემაში”.
უსუფაშვილმა კოლეგებს, პარლამენტში წარმოდგენილ პოლიტიკურ ძალებს, მის მიერ შეთავაზებული საკონსტიტუციო ცვლილებების პროექტზე ხელმოწერისკენ მოუწოდა.
უსუფაშვილის საკონსტიტუციო წინადადების საკონსტიტუციო ინიციატივად ქცევას სულ მცირე 76 დეპუტატის ხელმოწერა სჭირდება.