,,ცოტათი მიკვირს, რომ საქართველოს ახალგაზრდა იურისტთა ასოციაციას, რომელსაც ნამდვილად დიდ პატივს ვცემ, აქვს იმდენი დრო და რესურსი, რომ საქართველოში არსებული სრულიად უკანონო ვითარების ფონზე, როდესაც ყოველ ფეხის ნაბიჯზე ილახება ადამიანების უფლებები, აშინებენ მოსამართლეებს და ხდება მოქალაქეების დატერორება, აანალიზოს ჩემი გამოსვლები და მიმართვები.
გთხოვთ, გაიხსენოთ, რის საფუძველზე ჩამომერთვა მოქალაქეობა და ჩაუღრმავდეთ ამ გადაწყვეტილების ნამდვილ მიზეზებს. კანონი უზენაესია ჩემთვის, თუმცა, ოთარ ჭილაძის ფრაზა მახსენდება: “მე დაკარგულად ვერ ჩავთვლი იმას, რაც ჩემი ნებით არ დამითმია”. სადაც არ უნდა ვიყო, რომელ ქვეყანაშიც არ უნდა ვმოღვაწეობდე, მე ვრჩები ჩემი ქვეყნის ერთგული. საქართველოს მოქალაქეობა რუსი ოლიგარქის მარიონეტების მიერ ხელმოწერილი ფარატინა დოკუმენტით არ განისაზღვრება.
ვერანაირი ჯარიმა ვერ შემაშინებს, რომ ვებრძოლო იმ დიდ უსამართლობას, რომელიც ახლა ჩვენს სამშობლოშია.- ასე გამოეხმაურა მიხეილ სააკაშვილი საქართველოს ახალგაზრდა იურისტთა ასოციაციის მიერ უსკო-ში შეტანილ საჩივარს საქართველოს ყოფილი პრეზიდენტის მიხეილ სააკაშვილის ბათუმის მოსახლეობისადმი გაკეთებული ვიდეო მიმართვის გამო
აჭარის უმაღლესი საარჩევნო კომისიის (უსკო) თავმჯდომარის პარმენ ჯალაღონიას განმარტებით, საია-ს საჩივარს განიხილავს უსკო და დაიწყებს ადმინისტრაციულ წარმოებას, რის შემდეგაც კანონმდებლობის შესაბამისად მიღებული იქნება გადაწყვეტილება. ჯალაღონიას განმარტებით, აღნიშნული განცხადება ცენტრალურ საარჩევნო კომისიაშიც არის წარდგენილი: საარჩევნო კოდექსის შესაბამისად, თუკი დადასტურდება უცხო ქვეყნის მოქალაქის მონაწილეობა წინასაარჩევნო აგიტაციაში პირი 2 000 ლარით დაჯარიმდება.