პანკისში დააკავეს 23 წლის ახალგაზრდა , რომელმაც facebook-ის საკუთარ გვერდზე გამოქვეყნა თბილისში შესაძლო აფეთქებაზე მუქარის შემცველი ტექსტი და ფოტო .
აღნიშნულ ფაქტზე საქართველოს სახელმწიფო უსაფრთხოების სამსახურმა გამოძიება დაიწყო, საგამოძიებო მოქმედებებს სუს-ის კონტრტერორისტული დეპარტამენტი აწარმოებს. როგორც სახელმწიფო უსაფრთხოების სამსახურში აცხადებენ, 29 ივლისს, გვიან ღამით სოციალურ ქსელში ფეისბუკმომხმარებელმა, რომელსაც პროფილის სურათად ISIS-ის ტერორისტის ომარ ალ შიშანის (თარხან ბათირაშვილი) ფოტო აქვს, აფეთქების ამსახველი ფოტო გამოაქვეყნა სტატუსთან ერთად, რომელიც თბილისში 12:30 საათზე „ფეირვერკის“ შესახებ იტყობინებოდა. აღნიშნული პოსტი ინტერნეტმომხმარებლებმა თბილისში შესაძლო აფეთქების მუქარად მიიჩნიეს.
დაკავებული სოფელ დუისში მეუღლესთან და მშობლებთან ერთად ცხოვრობს. ხეობაში ახალგაზრდას და მის ოჯახს დადებითად ახასიათებენ და დაჯგუფება ისლამურ სახელმწიფოსთან მის კავშირს გამორიცხავენ და ამბობენ, რომ მან უბრალოდ იხუმრა. .