უცხოური მედიის ცნობით, დღეს დილით, დაახლოებით ათ საათზე საფრანგეთის ქალაქ სენტ-ეტიენ დუ რუვრეს ეკლესიაში წირვის დროს უკანა შესასვლელიდან შეიჭრა დანებით შეიარაღებული ორი მამაკაცი, მათ მძევლად აიყვანეს ხუთი ადამიანი – კიურე, ორი მონაზონი და მრევლის წევრები, რომელთაგან ერთი – მღვდელმსახური მოკლულია, მას დანით ყელი აქვს გამოჭრილი. საავადმყოფოში არიან გადაყვანილი დაჭრილი მძევალი და პოლიციელი. სენ ეტიენ დიუ რუვრეში უკვე გაემგზავრნენ საფრანგეთის პრეზიდენტი და შინაგან საქმეთა მინისტრი.
ლე ფიგაროს ცნობით, ერთ-ერთმა მონაზონმა, მძევლად აყვანილთაგან განსხვავებით, შესძლო გაქცევა და თავდასხმის შესახებ ხმა მიაწვდინა ადგილობრივ პოლიციას. ადგილზე გაგზავნილმა სწრაფი რეაგირების რაზმმა ალყაში მოაქცია თავდამსხმელები, მოლაპარაკებებისა და მცირე შეტაკების შემდეგ, რომელიც ერთ საათე ნაკლებ ხანს გაგრძელდა, სამართალდამცველებმა ორივე თავდამსხმელის ლიკვიდაცია მოახდინეს. მათი ვინაობა ჯერჯერობით უცნობია, შესაბამისად, უცნობია თავდასხმის მოტივიც. თუმცა არის ამ მხრივ საგულისხმო ფაქტიც – თვითმხილველთა განცხადებით, ეკლესიაში შეჭრის დროს თავდამსხმელები ალაჰის სადიდებელ სიტყვებს გაყვიროდნენ.